திருவாரூர் நகர் பகுதிக்கு உட்பட்ட வாளவாய்க்கால் பகுதியில் அமைந்துள்ள தேநீர் கடை ஒன்றில், வணிகப் பயன்பாட்டுக்கான எரிவாயு சிலிண்டரிலிருந்து தண்ணீர் வெளியேறியதாகக் கூறப்படும் வீடியோ சமூக வலைத்தளங்களில் வைரலாகி வருகிறது.
அக்கடையில் அடுப்பு எரியாததைத் தொடர்ந்து, சிலிண்டரின் எடை வழக்கத்தை விட அதிகமாக இருந்ததாகக் கூறப்படுகிறது. இதனால் சந்தேகமடைந்த கடை ஊழியர் சிலிண்டரைச் சோதித்துப் பார்த்தபோது, அதிலிருந்து தண்ணீர் வெளியேறியுள்ளது. இந்தச் சம்பவம் அப்பகுதியில் நுகர்வோர் மத்தியில் அதிர்ச்சியை ஏற்படுத்தியுள்ளது.
இதுகுறித்து வீடியோ பதிவு செய்துள்ள நபர், ஏற்கனவே சிலிண்டரில் தண்ணீர் நிரப்பப்பட்டு விநியோகம் செய்யப்படுவதாகக் கூறப்படும் தகவல்களைச் சுட்டிக்காட்டியுள்ளார். மேலும், ரூ.3,500-க்கும் அதிகமான விலைகொண்ட வணிக சிலிண்டர்களில் இத்தகைய குறைபாடுகள் ஏற்பட்டால், நுகர்வோருக்குப் பொருளாதார இழப்பு ஏற்படும் என்று அவர் கவலை தெரிவித்துள்ளார்.
இதனிடையே, சிலிண்டர்களைக் கழுவும்போது அதனுள் தண்ணீர் சென்றிருக்கலாம் எனச் சம்பந்தப்பட்ட எரிவாயு நிறுவனத் தரப்பில் விளக்கம் அளிக்கப்பட்டுள்ளதாக அந்த வீடியோவில் தெரிவிக்கப்பட்டுள்ளது. இந்தச் சம்பவத்தின் உண்மைத்தன்மை குறித்தும், சிலிண்டரில் தண்ணீர் கலந்ததற்கான உண்மையான காரணம் குறித்தும் உரிய அதிகாரிகள் ஆய்வு மேற்கொள்ள வேண்டும் எனப் பொதுமக்கள் கோரிக்கை விடுத்துள்ளனர்.