தமிழக வெற்றிக் கழகத்தின் திருப்பத்தூர் கிழக்கு மாவட்டச் செயலாளர் நவீன்குமார் மீது பெண் நிர்வாகிகள் அடுக்கடுக்கான குற்றச்சாட்டுகளை முன்வைக்கும் ஆடியோ சமூக வலைதளங்களில் வைரலாகி வருகிறது. இச்சம்பவம் அக்கட்சி வட்டாரத்தில் பெரும் பரபரப்பை ஏற்படுத்தியுள்ளது.
ஏற்கனவே பல்வேறு சர்ச்சைகளில் சிக்கியுள்ள நவீன்குமார் மீது, தவெகவைச் சேர்ந்த பெண் நிர்வாகிகள் தொலைபேசியில் உரையாடும் ஆடியோ தற்போது வெளியாகியுள்ளது. அந்த உரையாடலில், ஆம்பூர் நகரச் செயலாளராகப் பதவியில் இருக்கும் பிரவீன் மீது அவரது மனைவியே முதலமைச்சரிடம் புகார் அளித்ததாகவும், இதற்கு மாவட்டத் தலைமை ஆதரவாகச் செயல்பட்டதாகவும் குற்றஞ்சாட்டப்பட்டுள்ளது.
மேலும், முப்பது லட்சம் ரூபாய் பணம் கொடுத்து நகரச் செயலாளர் பதவி பெறப்பட்டதாகவும், எத்தனை புகார்கள் வந்தாலும் கட்சித் தலைமை தன்னை நீக்காது என நவீன்குமார் கூறியதாகவும் அந்த ஆடியோவில் தெரிவிக்கப்பட்டுள்ளது. இதற்கிடையே, வாணியம்பாடி ஒன்றியத்தைச் சேர்ந்த எழில் என்பவர், நவீனின் செயல்பாடுகள் தொடர்பான 19 வீடியோ ஆதாரங்களை மாவட்ட அலுவலகத்தில் சமர்ப்பித்துள்ளதாகக் கூறப்படுகிறது.
முன்னதாக மது அருந்தும் வீடியோக்கள் வெளியான நிலையில், பெண்களிடம் பணம் பெற்றது, கட்சித் தலைமையை அவதூறாகப் பேசியது போன்ற புகார்களும் நிலவுகின்றன. நவீன்குமார் நடத்தும் கூட்டங்களில் பெண்களிடம் முறையற்ற வகையில் நடந்துகொள்வதாகவும், அவரது பார்வையே சரியில்லை என்றும் பெண் நிர்வாகிகள் அந்த ஆடியோவில் கடுமையாகக் குற்றம்சாட்டியுள்ளனர்.
தொடர்ந்து எழும் புகார்கள் காரணமாக குடும்பத்தினரின் எதிர்ப்பை எதிர்கொண்டுள்ளதாகவும், இதனால் தவெக கூட்டங்கள் மற்றும் கட்சி நிகழ்ச்சிகளைப் புறக்கணிக்கத் தங்களது கணவர்கள் கூறுவதாகவும் பெண் நிர்வாகிகள் வேதனை தெரிவித்துள்ளனர். இவ்வளவு புகார்கள் எழுந்தும் கட்சித் தலைமை உடனடியாக நடவடிக்கை எடுக்காதது ஏன் என்ற கேள்வி வாணியம்பாடி தவெக தொண்டர்கள் மத்தியில் எழுந்துள்ளது. இந்த விவகாரம் அக்கட்சிக்குள் பெரும் உட்கட்சிப் பூசலை ஏற்படுத்தியுள்ள நிலையில், சம்பந்தப்பட்ட நிர்வாகிகளின் விளக்கம் மற்றும் தலைமைக் கழகத்தின் நடவடிக்கை என்னவாக இருக்கும் என்ற எதிர்பார்ப்பு எழுந்துள்ளது.









