தஞ்சாவூர்: தஞ்சாவூர் நகரில் மின்சாரம் தொடர்பான குறைகள் மற்றும் கோரிக்கைகளுக்கு உடனடியாகத் தீர்வு காணும் வகையில், வருகிற 24ஆம் தேதி (செவ்வாய்க்கிழமை) மின் நுகர்வோர் குறைதீர்க்கும் கூட்டம் நடைபெற உள்ளதாக மின்வாரியம் அறிவித்துள்ளது. இதில் பொதுமக்கள் பங்கேற்று தங்களது குறைகளை மனுக்களாக அளிக்கலாம்.
இதுகுறித்து தமிழ்நாடு மின் பகிர்மானக் கழகத்தின் தஞ்சாவூர் செயற்பொறியாளர் மாலதி வெளியிட்டுள்ள செய்திக்குறிப்பில் தெரிவிக்கப்பட்டுள்ளதாவது:
தஞ்சாவூரில் உள்ள செயற்பொறியாளர் அலுவலகத்தில் வருகிற 24ஆம் தேதி காலை 11 மணி முதல் பிற்பகல் 1 மணி வரை மின் நுகர்வோர் குறைதீர்க்கும் கூட்டம் நடைபெறுகிறது. மின் பகிர்மான வட்ட மேற்பார்வை பொறியாளர் ஜெயந்தி தலைமையில் நடைபெறும் இந்தக் கூட்டத்தில், பொதுமக்களின் கோரிக்கைகள் மற்றும் மின்சாரம் தொடர்பான புகார்கள் நேரடியாகப் பெறப்பட உள்ளன.
பங்கேற்கக்கூடிய பகுதிகள்:
தஞ்சாவூர் நகரின் தெற்கு வீதி, வடக்கு வீதி, மேல வீதி, கரந்தை, பள்ளியக்கிரஹாரம், கீழவாசல், தொல்காப்பியர் சதுக்கம், மேரீஸ் கார்னர், அருளானந்த நகர், பர்மா காலனி, நிர்மலா நகர், யாகப்பா நகர், அருளானந்தம்மாள் நகர், பழைய வீட்டுவசதி வாரியக் குடியிருப்பு, காந்திஜி சாலை, மருத்துவக்கல்லூரி சாலை, நீலகிரி, மானோஜிப்பட்டி, ரகுமான் நகர், ரெட்டிப்பாளையம் சாலை, சிங்கப்பெருமாள்குளம், ஜெபமாலைபுரம், வித்யாநகர், மேலவெளி ஊராட்சி, தமிழ்ப் பல்கலைக்கழக வளாகக் குடியிருப்பு, மாதாக்கோட்டை சாலை, புதிய பேருந்து நிலையம், திருவேங்கடநகர், இனாத்துக்கான்பட்டி, நட்சத்திரா நகர், நாஞ்சிக்கோட்டை உள்ளிட்ட பகுதிகளைச் சேர்ந்த மின் நுகர்வோர் மற்றும் பொதுமக்கள் இந்தக் கூட்டத்தில் கலந்து கொள்ளலாம்.
மனு அளிக்கப்பட வேண்டிய புகார்கள்:
மின்சார இணைப்பு தொடர்பான பிரச்சினைகள், குறைந்த மின்னழுத்தம், அடிக்கடி ஏற்படும் மின்தடை, பழுதடைந்த மின்கம்பிகள், மின்மாற்றிகள் தொடர்பான கோரிக்கைகள், புதிய மின் இணைப்பு மற்றும் மின்கட்டணம் தொடர்பான புகார்கள் என மின்வாரியம் சார்ந்த பல்வேறு பிரச்சினைகள் குறித்து பொதுமக்கள் தங்களது மனுக்களை நேரில் அளிக்கலாம்.
எனவே, சம்பந்தப்பட்ட பகுதிகளைச் சேர்ந்த மின் நுகர்வோர் இந்தத் வாய்ப்பைப் பயன்படுத்தி, தங்களது குறைகளை நேரில் தெரிவித்து உரிய தீர்வு பெற்றுக்கொள்ளுமாறு கேட்டுக்கொள்ளப்படுகிறார்கள்.









