திருச்சி மாவட்டம், ஸ்ரீரங்கம் பகுதியில் உள்ள தனியார் கல்லூரியில், மாவட்ட நிர்வாகம் மற்றும் மாவட்ட வேலைவாய்ப்பு தொழில்நெறி வழிகாட்டும் மையம் சார்பில் தனியார் துறை வேலைவாய்ப்பு முகாம் நடைபெற்றது. இந்நிகழ்வில் இந்து சமய அறநிலையத்துறை அமைச்சர் ரமேஷ் கலந்துகொண்டு முகாமைத் தொடங்கி வைத்து, தேர்வானவர்களுக்குப் பணி நியமன ஆணைகளை வழங்கினார்.
இந்த முகாமில் மாவட்ட ஆட்சியர் பிரதிக் தாயள் மற்றும் அரசுத் துறை அலுவலர்கள் உடன் இருந்தனர். முகாம் நிறைவுக்குப் பிறகு செய்தியாளர்களைச் சந்தித்த அமைச்சர் ரமேஷ் கூறுகையில், இம்முகாமில் 240-க்கும் மேற்பட்ட தனியார் நிறுவனங்கள் பங்கேற்றுள்ளதாகவும், 3,000-த்திற்கும் மேற்பட்டோர் கலந்துகொண்டுள்ளதாகவும் தெரிவித்தார். பொதுமக்களின் கோரிக்கையை ஏற்று நடத்தப்பட்டுள்ள இந்த முகாம் முதற்கட்டமானது மட்டுமே என்றும், இனி வரும் காலங்களில் ஒவ்வொரு மூன்று மாதங்களுக்கு ஒருமுறை பெரிய நிறுவனங்களை அழைத்துத் தொடர் வேலைவாய்ப்பு முகாம்கள் நடத்தப்படும் என்றும் அவர் குறிப்பிட்டார்.
தொடர்ந்து கோயில்களின் திருப்பணிகள் குறித்துப் பேசிய அவர், கடந்த ஆட்சிக் காலத்தில் தொடங்கப்பட்டு பாதியில் நின்ற மற்றும் தொடங்கப்படாத பணிகளை முடிக்க ரூ.400 கோடி தேவைப்படுகிறது என்றார். ஏற்கனவே உள்ள திட்டங்களுக்கும் நிதி தேவைப்படுவதால், அதற்கேற்ப பட்ஜெட்டில் அடிப்படையாகத் தேவையான கட்டுமானப் பணிகளையும், கும்பாபிஷேகத்திற்கான திருப்பணிகளையும் முன்னெடுத்து வருவதாகத் தெரிவித்தார். கடந்த ஆட்சியைப் போல தேவையில்லாத இடங்களில் திட்டங்களை அறிவித்துவிட்டுப் பணம் கொடுக்காமல் பாதியில் நிறுத்தும் வழக்கம் இந்த அரசுக்கு இல்லை எனவும் அவர் சுட்டிக்காட்டினார்.
கோயில்களில் எந்தப் பணிகளுக்கும் யாரிடமும் பணம் கொடுக்க வேண்டாம் எனப் பொதுமக்களுக்கு எச்சரிக்கை விடுத்த அமைச்சர், அப்படிப் பணம் கேட்டால் ஆதாரத்துடன் புகார் அளிக்கலாம் என்றும், உடனடி நடவடிக்கை எடுக்கப்படும் எனவும் உறுதியளித்தார். மேலும், கோயில்களுக்கு வரும் கர்ப்பிணிப் பெண்கள், முதியவர்கள், மாற்றுத்திறனாளிகள் மற்றும் பச்சிளம் குழந்தைகளுடன் வருபவர்களுக்காகத் தனிப்பாதைகள் அமைக்கப்பட்டுள்ளதாகவும், மாற்றுத்திறனாளிகளுக்காக மின்சார சக்கர நாற்காலிகள் ஏற்பாடு செய்யப்பட்டுள்ளதாகவும் தெரிவித்தார். கோயில் தொடர்பான புகார்களைத் தெரிவிக்கத் பிரத்யேக வலைதளங்களும், தொலைபேசி எண்களும் அறிவிக்கப்பட்டுள்ளதாகக் கூறிய அவர், ஸ்ரீரங்கம் யாத்ரி நிவாஸ் நிர்வாகம் மாநகராட்சிக்கு வரி பாக்கி செலுத்த வேண்டிய விவகாரம் தொடர்பாகச் சம்பந்தப்பட்ட அதிகாரிகளிடம் விளக்கம் கேட்கப்பட்டுள்ளதாகவும், உரிய நடவடிக்கை எடுக்கப்படும் எனவும் தெரிவித்தார்.