கன்னியாகுமரி மாவட்டம் பள்ளம் பகுதியில் வீட்டின் பூட்டை உடைத்து 55 பவுன் தங்கம் மற்றும் வைர நகைகளை திருடிய வழக்கில் பெண் உட்பட மூன்று பேரை காவல்துறையினர் கைது செய்துள்ளனர்.
பள்ளம் பகுதியைச் சேர்ந்த சேவியர் சீலன் என்பவரின் மனைவி ஜூலிட் அமலா என்பவரது வீட்டில் இந்தத் திருட்டுச் சம்பவம் அரங்கேறியுள்ளது. புகாரின் அடிப்படையில் மேற்கொள்ளப்பட்ட விசாரணையில், தூத்துக்குடி லயன்ஸ் டவுன் பகுதியைச் சேர்ந்த டோமினிக் என்பவரின் மகன்களான மரிய அந்தோணி ஆக்னல் (36), லக்வின் (26) மற்றும் சோனக்கன்விளை பகுதியைச் சேர்ந்த சிதம்பரம் என்பவரது மகள் சந்தனமாரி (29) ஆகிய மூன்று பேரை காவல்துறையினர் கைது செய்துள்ளனர்.
கைது செய்யப்பட்டவர்களிடமிருந்து மேற்கண்ட நகைகள் மீட்கப்பட்டுள்ளதா என்பது குறித்தும், இந்தச் சம்பவத்தில் வேறு யாருக்காவது தொடர்பு உள்ளதா என்பது குறித்தும் காவல்துறையினர் தீவிர விசாரணை நடத்தி வருகின்றனர்.