ராஜபாளையத்தில் 'விஜய் விஜயம்' என்ற புதிய செயலியை சமூக நலன் மற்றும் மகளிர் மேம்பாட்டுத் துறை அமைச்சர் ஜெகதீஸ்வரி அறிமுகம் செய்து வைத்தார்.

​முன்னதாக, பெண்கள் பாதுகாப்பை வலியுறுத்தி 500க்கும் மேற்பட்டோர் பங்கேற்ற பிரமாண்ட விழிப்புணர்வு ஊர்வலம் மற்றும் சிலம்பாட்ட நிகழ்வை அமைச்சர் தொடங்கி வைத்தார். ஊர்வலம் காந்தி சிலையில் தொடங்கி தென்காசி தேசிய நெடுஞ்சாலையில் உள்ள தனியார் மண்டபத்தை வந்தடைந்தது. ​அங்கு வந்த அமைச்சர், மேடைக்குச் செல்லாமல் மக்களோடு மக்களாக அமர்ந்து பேசிக் கொண்டிருந்தார். அப்போது, அமைச்சரின் வாழ்க்கைப் பயணத்தைக் கூறும் 'செயற்கை நுண்ணறிவு' (AI) குறும்படம் திரையிடப்பட்டது. தனி ஒரு பெண்ணாக இருந்து, பல சவால்களைக் கடந்து 3 பெண் குழந்தைகளையும் வளர்த்து, பத்திரிகை மற்றும் விளம்பரத் துறையில் சாதித்த தன் பழைய கதையைக் கண்ட அமைச்சர், மக்கள் மத்தியிலேயே உணர்ச்சிவசப்பட்டு கதறி அழுதார். உடனடியாகப் பொதுமக்கள் அவருக்கு ஆறுதல் கூறி தைரியமளித்து மேடைக்கு அனுப்பி வைத்தனர். ​தொடர்ந்து, மேடையில் குத்துவிளக்கேற்றி ராஜபாளையம் தொகுதி மக்களுக்காக 'விஜய் விஜயம்' செயலியை அமைச்சர் அறிமுகம் செய்தார். இதன் மூலம் குடிநீர், கழிவுநீர், சுகாதாரம் சார்ந்த புகார்களுக்கு உடனடி தீர்வு காணப்படும் எனத் தெரிவிக்கப்பட்டுள்ளது. விழாவின் நிறைவாக சாதனைப் பெண்களுக்குக் கேடயங்கள் வழங்கி கௌரவிக்கப்பட்டது.