நெல்லை அரசு சித்த மருத்துவக் கல்லூரிக்குச் சொந்தமான 3½ ஏக்கர் நிலத்தை மத்திய அரசு நிறுவனமான இ.எஸ்.ஐ. மருத்துவமனைக்கு வழங்குவதைக் கண்டித்து, மாணவ-மாணவிகள் வகுப்புகளைப் புறக்கணித்து உள்ளிருப்பு போராட்டத்தில் ஈடுபட்டுள்ளனர்.
சென்னைக்கு அடுத்தபடியாக நெல்லை மாவட்டம் பாளையங்கோட்டையில் அரசு சித்த மருத்துவக் கல்லூரி செயல்பட்டு வருகிறது. இக்கல்லூரியில் இளநிலை மற்றும் முதுநிலை உள்ளிட்ட பல்வேறு பாடப்பிரிவுகளில் 600-க்கும் மேற்பட்ட மாணவ-மாணவிகள் கல்வி பயின்று வருகின்றனர். நெல்லை மாநகரின் மையப்பகுதியான வண்ணார்பேட்டையில் இக்கல்லூரிக்குச் சொந்தமான இடம் உள்ளது. இங்கு முன்பு சித்த மருத்துவக் கல்லூரி மாணவர் விடுதி செயல்பட்டு வந்தது.
தற்போது இந்த வளாகத்தில் உள்ள சுமார் 3½ ஏக்கர் நிலத்தை, அருகில் உள்ள மத்திய அரசு நிறுவனமான இ.எஸ்.ஐ. மருத்துவமனைக்கு வழங்க தமிழக அரசு முடிவு செய்துள்ளதாகத் தகவல்கள் வெளியாகியுள்ளன. இந்தத் முடிவுக்கு அரசு சித்த மருத்துவக் கல்லூரி மாணவர்கள் கடும் எதிர்ப்பு தெரிவித்துள்ளனர். கல்லூரி நிலத்தை இ.எஸ்.ஐ. மருத்துவமனைக்கு வழங்கக் கூடாது என்பதை வலியுறுத்தி, மாணவர்கள் வகுப்புகளைப் புறக்கணித்து கல்லூரி வளாகத்திற்குள் உள்ளிருப்பு போராட்டத்தில் ஈடுபட்டுள்ளனர். அரசுக்கு எதிராக முழக்கங்களை எழுப்பிய மாணவர்கள், நிலம் வழங்கும் திட்டத்தை அரசு கைவிடும் வரை போராட்டம் தொடரும் என அறிவித்துள்ளனர். மாணவர்களின் இந்த திடீர் போராட்டத்தால் அப்பகுதியில் பரபரப்பான சூழல் நிலவுகிறது.