திண்டுக்கல் மாவட்டம், நத்தம் பேருந்து நிலையத்தில் பேருந்துக்காகக் காத்திருந்த 70 வயது மூதாட்டி மீது அரசு பேருந்து மோதிய விபத்தில் அவரது இரு கால்களும் பலத்த சேதமடைந்தன.
நத்தம் அருகேயுள்ள முளையூரைச் சேர்ந்த பழ வியாபாரி சின்னபொன்னு (70), மதுரையில் வியாபாரம் செய்வதற்காக நத்தம் பேருந்து நிலையத்திற்கு வந்துள்ளார். அப்போது பேருந்து நிறுத்துமிடத்தில் அமர்ந்திருந்த அவர் மீது, நத்தத்திலிருந்து மதுரை நோக்கிச் செல்லவிருந்த அரசு பேருந்தை ஓட்டுநர் சேதுபதி பின்தளத்தில் (ரெவர்ஸ்) இயக்க முயன்றபோது எதிர்பாராதவிதமாக மோதியுள்ளது.
இந்த விபத்தில் மூதாட்டியின் இரு கால்களும் நசுங்கி பலத்த காயமடைந்தன. உயிருக்கு ஆபத்தான நிலையில் வலியால் துடித்த அவரை அருகில் இருந்தவர்கள் மீட்டு நத்தம் அரசு மருத்துவமனையில் அனுமதித்தனர். அங்கு அவருக்கு தீவிர சிகிச்சை அளிக்கப்பட்டு வருகிறது.
இந்த விபத்து தொடர்பாக நத்தம் காவல் துறையினர் வழக்குப் பதிவு செய்து தீவிர விசாரணை நடத்தி வருகின்றனர்.









