மேகமலை வனப்பகுதியில் ஆக்கிரமிப்புகள் அகற்றம்: துணை ராணுவப் படைகளை பயன்படுத்த நேரிடும் – உச்சநீதிமன்றம் எச்சரிக்கை

மேகமலை உள்ளிட்ட அகஸ்தியமலை சுற்றுச்சூழல் முக்கியத்துவம் வாய்ந்த பகுதிகளில் உள்ள வன ஆக்கிரமிப்புகளை அகற்றும் பணியை மாநில அரசு முறையாக செயல்படுத்தவில்லை என்றால், ஆக்கிரமிப்புகளை அகற்ற துணை ராணுவப் படையினரின் உதவியை பெற வேண்டிய நிலை ஏற்படும் என உச்சநீதிமன்றம் எச்சரித்துள்ளது.

அகஸ்தியமலை நிலப்பரப்பில் உள்ள வனப்பகுதிகள், புலிகள் காப்பகங்கள் மற்றும் வனவிலங்கு சரணாலயங்களில் நீண்ட காலமாக தொடரும் ஆக்கிரமிப்புகள் தொடர்பான வழக்கை நீதிபதிகள் விக்ரம் நாத், சந்தீப் மேத்தா ஆகியோர் அடங்கிய அமர்வு விசாரித்தது.

ஸ்ரீவில்லிபுத்தூர்–மேகமலை புலிகள் காப்பகத்தில் மட்டும் 4,601-க்கும் மேற்பட்டோர் சுமார் 5,000 ஹெக்டேருக்கும் அதிகமான வன நிலங்களை ஆக்கிரமித்துள்ளதாக மத்திய அதிகாரமளிக்கப்பட்ட குழுவின் அறிக்கையில் தெரிவிக்கப்பட்டிருந்தது. இதுவரை 66 ஆக்கிரமிப்பாளர்கள் மட்டுமே இடமாற்றம் செய்யப்பட்டுள்ளதாகவும், ஆக்கிரமிக்கப்பட்ட நிலத்தில் 52.86 ஹெக்டேர் மட்டுமே மீட்கப்பட்டுள்ளதாகவும் நீதிமன்றம் சுட்டிக்காட்டியது.

பல ஆண்டுகளாக நீதிமன்ற உத்தரவுகள் மற்றும் அதிகாரிகளின் நடவடிக்கைகள் இருந்தபோதிலும், ஆக்கிரமிப்புகளை அகற்றும் பணியில் போதிய முன்னேற்றம் ஏற்படவில்லை என உச்சநீதிமன்றம் அதிருப்தி தெரிவித்தது. சுற்றுச்சூழல் முக்கியத்துவம் வாய்ந்த பகுதிகளை பாதுகாப்பதில் தாமதம் தொடரக்கூடாது என்றும் நீதிமன்றம் வலியுறுத்தியது.

இதையடுத்து, ஆக்கிரமிப்புகளை பிரிவு வாரியாக அகற்றுவதற்கான விரிவான கால அட்டவணையை மாநில அரசு தயாரித்து சமர்ப்பிக்க வேண்டும் என உத்தரவிடப்பட்டது. இதில் ஆக்கிரமிப்புகளை அகற்றுவதற்கான காலக்கெடு, பொறுப்பான அதிகாரிகள், மறுவாழ்வு நடவடிக்கைகள் மற்றும் ஆக்கிரமிப்பு அகற்றப்பட்ட பின்னர் வனப்பகுதியை மீட்டெடுக்கும் திட்டம் ஆகியவை இடம்பெற வேண்டும்.

மேலும், புலிகள் காப்பகம் மற்றும் வனப்பகுதிகளில் செயல்பட்டு வரும் சட்டவிரோத விடுதிகள், வணிக நிறுவனங்கள் மற்றும் சுற்றுலா தொடர்பான அங்கீகாரமற்ற கட்டமைப்புகளை அகற்றவும் நீதிமன்றம் உத்தரவிட்டுள்ளது. இதுபோன்ற நிறுவனங்களுக்கு வழங்கப்பட்டுள்ள சட்டவிரோத மின் இணைப்புகள் உள்ளிட்ட வசதிகளையும் துண்டிக்க நடவடிக்கை எடுக்க வேண்டும் என அறிவுறுத்தப்பட்டுள்ளது.

வன ஆக்கிரமிப்பு பகுதிகளில் அரசு அலுவலகங்கள், பொது பயன்பாட்டு வசதிகள் உள்ளிட்டவை தொடர்ந்து செயல்படுவது ஆக்கிரமிப்புக்கு மறைமுக அங்கீகாரம் அளிப்பது போன்ற நிலையை உருவாக்குவதாகவும் நீதிமன்றம் குறிப்பிட்டது. எனவே, இதுபோன்ற அரசு அமைப்புகள் மற்றும் அங்கீகாரமற்ற கட்டமைப்புகளை குறிப்பிட்ட காலத்துக்குள் இடமாற்றம் செய்யவோ, அகற்றவோ நடவடிக்கை எடுக்க வேண்டும் என உத்தரவிடப்பட்டுள்ளது.

மேலும், ஆக்கிரமிப்புகளை அகற்றும் நடவடிக்கையில் மாநில அரசு உரிய முறையில் செயல்படத் தவறினால், மத்திய அதிகாரமளிக்கப்பட்ட குழு துணை ராணுவப் படைகளை பயன்படுத்த பரிந்துரை செய்யலாம் என உச்சநீதிமன்றம் தெரிவித்துள்ளது. இதன் மூலம் வன நிலங்களை மீட்பதில் அரசு அதிகாரிகள் துரிதமாக செயல்பட வேண்டும் என்ற கடுமையான எச்சரிக்கையை நீதிமன்றம் விடுத்துள்ளது.

அகஸ்தியமலை நிலப்பரப்பு மற்றும் அதனைச் சுற்றியுள்ள பாதுகாக்கப்பட்ட வனப்பகுதிகள் அரிய வனவிலங்குகள் மற்றும் உயிரினங்களுக்கான முக்கிய வாழ்விடமாக இருப்பதால், அவற்றின் சுற்றுச்சூழல் பாதுகாப்பை எந்த காரணத்திற்காகவும் காலவரையின்றி தள்ளிப்போட முடியாது என நீதிமன்றம் வலியுறுத்தியுள்ளது.