கோபிசெட்டிபாளையம் அருகே உள்ள கொடிவேரி அணைப் பகுதியில் சுற்றுலாத்துறை அமைச்சர் ஆர். ராஜேஷ்குமார் நேரில் ஆய்வு மேற்கொண்டார். கொடிவேரி அணைக்கட்டு மேம்பாட்டுப் பணிகளுக்காக ரூ. 7 கோடி ஒதுக்கீடு செய்யப்பட்டுள்ள நிலையில், அதிகாரிகளுடன் அவர் ஆலோசனை நடத்தினார்.
ஆய்வுக்குப் பிறகு செய்தியாளர்களைச் சந்தித்த அமைச்சர் ராஜேஷ்குமார் தெரிவித்ததாவது:
ஈரோடு மாவட்டத்தின் முக்கிய சுற்றுலாத் தலமான கொடிவேரி அணைப் பகுதியில் மேம்பாட்டுப் பணிகள் மேற்கொள்ளப்பட்டு வருகின்றன. கடந்த 2026-27 நிதியாண்டு மானியக் கோரிக்கை பட்ஜெட்டில் இப்பகுதிக்கான மேம்பாட்டுப் பணிகளுக்காக ரூ. 7 கோடி ஒதுக்கீடு செய்யப்பட்டு, அதற்கான அரசாணையும் பிறப்பிக்கப்பட்டுள்ளது. இதன் மூலம் இப்பகுதியில் உள்கட்டமைப்பு வசதிகள் உருவாக்கப்பட்டு வருகின்றன.
கொடிவேரி அணைக்கு ஆண்டுதோறும் 5 லட்சத்திற்கும் மேற்பட்ட சுற்றுலாப் பயணிகள் வந்து செல்கின்றனர். அவர்களின் நலனைக் கருத்தில் கொண்டு, முதியவர்கள் தங்கி ஓய்வெடுப்பதற்கான ஓய்வறைகள் மற்றும் பூங்கா வசதிகள் மேம்படுத்தப்படவுள்ளன. மேலும், சுற்றுலா வளர்ச்சிக் குழுவின் ஒப்புதலைப் பெற்று, தேவையான அடிப்படைப் பாதுகாப்பு ஏற்பாடுகள் முழுமையாகச் செய்யப்படும்.
அணைப் பகுதியில் ஏற்படும் போக்குவரத்து நெரிசலைக் குறைக்க மாற்றுப் பாதைகளை அமைப்பது குறித்து மாவட்ட ஆட்சியர் மற்றும் சட்டமன்ற உறுப்பினர் கே.ஏ. செங்கோட்டையன் ஆகியோருடன் இணைந்து ஆலோசித்து நடவடிக்கை எடுக்கப்படும். பொதுமக்கள் மற்றும் முதியவர்கள் எளிதாகப் பயணம் செய்ய பேட்டரி வாகன வசதிகளை ஏற்படுத்துவது குறித்தும் பரிசீலிக்கப்பட்டு வருகிறது.
அணையில் மோட்டார் படகுகள் இயக்குவது குறித்த கேள்விக்கு பதிலளித்த அமைச்சர், கொடிவேரி அணையின் இயற்கைச் சூழல் மற்றும் நீர் ஆதாரம் பாதிக்கப்படக் கூடாது என்பதில் அரசு உறுதியாக உள்ளதாகத் தெரிவித்தார். இப்பகுதி நீர் குடிநீராகப் பயன்படுத்தப்படுவதால், முதற்கட்ட மேம்பாட்டுப் பணிகள் முடிந்த பிறகு, அடுத்தகட்டமாக மோட்டார் படகுகள் இயக்குவது குறித்து ஆலோசித்து முடிவு செய்யப்படும் என்றார்.
சுற்றுலாப் பயணிகளின் கூட்ட நெரிசலைத் தவிர்க்க, தற்போதுள்ள டோக்கன் கவுண்ட்டருடன் சேர்த்து கூடுதலாக ஒரு டிக்கெட் கவுண்ட்டர் அமைக்கப்படும். மேலும், நவீன காலத்திற்கு ஏற்ப, ஆன்லைன் மூலமாக இ-டிக்கெட் பதிவு செய்யும் வசதியை ஏற்படுத்துவது குறித்து மாவட்ட நிர்வாகத்தின் ஆலோசனையின் பேரில் நடவடிக்கை மேற்கொள்ளப்படும்.
கூட்ட நெரிசல் அதிகம் உள்ள காலங்களில் தீயணைப்புத் துறையினர் சேவையைப் பயன்படுத்துவது குறித்து மாவட்ட ஆட்சியர் தனிப் பிரிவு ஒன்றை உருவாக்கலாம் எனத் தெரிவித்துள்ளார். அதன்படி, தீயணைப்புத் துறை, மருத்துவத் துறை, பேரூராட்சி நிர்வாகம் மற்றும் ஊரக வளர்ச்சித் துறை ஆகிய அனைத்துத் துறைகளையும் ஒருங்கிணைத்து சுற்றுலாப் பயணிகளின் பாதுகாப்பு உறுதி செய்யப்படும் என்றார்.
ஈரோடு மாவட்டத்தில் உள்ள பல்வேறு சுற்றுலாத் தலங்களை ஆய்வு செய்து வரும் அமைச்சர், பொதுமக்களிடமிருந்தும் மக்கள் பிரதிநிதிகளிடமிருந்தும் கோரிக்கை மனுக்கள் பெறப்பட்டுள்ளதாகத் தெரிவித்தார். தமிழகத்தின் அனைத்து வருவாய் மாவட்டங்களிலும் சுற்றுலாத் தலங்களை மேம்படுத்தும் வகையில், அடுத்த நான்கு மாதங்களில் தாக்கல் செய்யப்படவுள்ள புதிய பட்ஜெட்டில் விரிவான திட்டங்கள் அறிவிக்கப்படும் என்றார்.