கோயம்புத்தூர் மாவட்டம் வால்பாறையில் அமைந்துள்ள பாலூட்டும் தாய்மார்களுக்கான அறை முறையாகப் பராமரிக்கப்படாமல் பாழடைந்து வருவதாகத் தாய்மார்களும் பொதுமக்களும் கவலை தெரிவித்துள்ளனர்.
கடந்த 2015 ஆம் ஆண்டு ஆகஸ்ட் 3 ஆம் தேதி, உலகத் தாய் பாலூட்டல் வாரத்தையொட்டி, வால்பாறை பழைய பேருந்து நிலையத்தில் தாய்மார்களின் நலனைக் கருத்திற்கொண்டு இந்த அறை காணொளி காட்சி மூலமாகத் திறக்கப்பட்டது. முன்னாள் முதலமைச்சர் ஜெயலலிதா ஆட்சிக் காலத்தில் தொடங்கப்பட்ட இந்தச் சேவை, அதிமுக ஆட்சி வரை பயன்பாட்டில் இருந்து வந்தது.
எனினும், அதன்பிறகு வந்த காலக்கட்டங்களில் இந்த அறை முறையாகப் பராமரிக்கப்படவில்லை என்றும், தற்போது பயன்பாடின்றிப் பாழடைந்து வருவதாகவும் கூறப்படுகிறது. இதனால் வால்பாறை பகுதிக்கு வந்து செல்லும் பச்சிளம் குழந்தைகளின் தாய்மார்கள் பெரும் அவதிக்குள்ளாகி வருகின்றனர்.
தமிழகம் முழுவதும் பல கோடி ரூபாய் மதிப்பீட்டில் கட்டப்பட்ட 352-க்கும் மேற்பட்ட பாலூட்டும் தாய்மார்களின் அறைகள் இதே போன்றதொரு அவல நிலையைச் சந்தித்து வருவதாகத் தகவல்கள் தெரிவிக்கின்றன. எனவே, மகளிர் நலனைக் காக்கும் வகையில் சம்பந்தப்பட்ட அதிகாரிகள் உடனடியாகத் தலையிட்டு, இந்த அறைகளை மீண்டும் பயன்பாட்டுக்குக் கொண்டுவரத் தகுந்த நடவடிக்கை எடுக்க வேண்டும் என்று கோரிக்கை விடுக்கப்பட்டுள்ளது.