ஆட்சிகள் மாறினாலும் காட்சிகள் மாறவில்லை என்ற கதையாகத் தமிழகத்தில் கஸ்டோடியல் மரணங்கள் தொடர்கின்றன - முன்னாள் அமைச்சர் மாஃபா பாண்டியராஜன் பேட்டி!

விருதுநகர்: தமிழகத்தில் ஆட்சிகள் மாறினாலும், காவல் மரணங்கள் (Custodial Deaths) தொடர்வது வேதனையளிப்பதாக முன்னாள் அமைச்சர் மாஃபா பாண்டியராஜன் குற்றம்சாட்டியுள்ளார்.

பெருந்தலைவர் காமராஜரின் பிறந்த நாளான கல்வி வளர்ச்சி நாளை முன்னிட்டு, விருதுநகரில் உள்ள அவரது நினைவில்லத்தில் அதிமுக சார்பில் முன்னாள் அமைச்சர் மாஃபா பாண்டியராஜன் மாலை அணிவித்து மரியாதை செலுத்தினார். அதனைத் தொடர்ந்து செய்தியாளர்களைச் சந்தித்த அவர் கூறியதாவது:

கடந்த அதிமுக ஆட்சிக் காலத்தில் விருதுநகர் மாவட்ட மக்களின் நலனுக்காகக் கொண்டு வரப்பட்ட பல்வேறு திட்டங்கள், தற்போதைய தவெக ஆட்சியில் முடக்கப்பட்டு, கிடப்பில் போடப்பட்டுள்ளன. குறிப்பாக, இங்குள்ள நீர்நிலைகளைத் தூர்வாரும் பணிகள் பாதியிலேயே நிறுத்தப்பட்டுள்ளன. பாதாளச் சாக்கடைத் திட்டம் அறிவிக்கப்பட்டு 6 ஆண்டுகள் கடந்தும் இன்னும் முழுமையடையாமல் உள்ளது. மறைந்த முதலமைச்சர் ஜெயலலிதா அவர்களால் விருதுநகருக்கு அறிவிக்கப்பட்ட உயர்தர பல் மருத்துவக் கல்லூரி (Center of Excellence Dental College) திட்டம், தற்போது வேறு தொகுதிக்கு மாற்றப்பட்டுள்ளது. மக்கள் நலன் சார்ந்த இப்பிரச்சினைகளுக்குத் தற்போதைய அரசு போர்க்கால அடிப்படையில் தீர்வு காண வேண்டும்.

அண்ணா தொழிற்சங்கத்தின் சார்பில் இன்று ஆலோசனைக் கூட்டம் நடைபெறுகிறது. தொழிற்சங்கங்களுக்கான அங்கீகாரம் (Recognition) பெறுவதில் தற்போது பெரும் சிக்கல் எழுந்துள்ளது. குறிப்பாக, மத்திய அரசால் கொண்டு வரப்பட்டு, கடந்த ஏப்ரல் 1-ஆம் தேதி முதல் மாநில அரசால் அரசாணை வெளியிடப்பட்டுள்ள புதிய தொழிலாளர் சட்டத் தொகுப்புகள் (Labor Codes), தொழிற்சங்கங்களின் தன்னாட்சிச் செயல்பாடுகளுக்குப் பெரும் அச்சுறுத்தலாக உருவெடுத்துள்ளன. இதுகுறித்து தற்போதைய தொழிலாளர் நலத்துறை அமைச்சருக்கோ அல்லது மனிதவள மேம்பாட்டு அமைச்சருக்கோ எவ்வித அடிப்படைப் புரிதலும் இல்லை.

சமீபத்தில் 'பீட்டர் & பால்' (Peter & Paul) நிறுவனத்தில் ஏற்பட்ட விபத்தில், வெளிமாநிலத்தைச் சேர்ந்த 20 பெண் தொழிலாளர்கள் உயிரிழந்தது நெஞ்சை உலுக்கும் சம்பவமாகும். தொழிலாளர் பாதுகாப்பு மற்றும் நலச் சட்டங்களை அப்பட்டமாக மீறி, கட்டிடத்தின் முதல் தளத்தில் தங்க வைக்கப்பட்டிருந்த பெண் தொழிலாளர்களே இந்த விபத்தில் பலியாகியுள்ளனர். ஆனால், அந்த நிறுவனத்தின் மீது இதுவரை எவ்விதக் கடுமையான சட்ட நடவடிக்கையும் எடுக்கப்படவில்லை. அந்நிறுவனத்தின் உரிமையாளர் தவெக அரசின் முக்கிய அமைச்சர் ஒருவரின் நெருங்கிய உறவினர் என ஊடகங்களில் செய்திகள் வெளியாகியுள்ளன.

பாதுகாப்பற்ற சூழலில் பணிபுரியும் வெளிமாநிலத் தொழிலாளர்களின் உரிமைகள் பறிக்கப்படுவது, இரு மாநிலங்களுக்கு இடையேயான சுமூக உறவைப் பாதிக்கும். தமிழகத்தில் சுமார் 20 லட்சம் வெளிமாநிலத் தொழிலாளர்கள் பணியாற்றி வரும் நிலையில், ஒடிசா மாநிலத்தைச் சேர்ந்தவர்கள் மட்டுமே ஒரு லட்சம் பேர் உள்ளனர். இத்தகைய தொழிலாளர் சுரண்டலை எதிர்த்து, அண்ணா தொழிற்சங்கம் சார்பில் இன்று கண்டனத் தீர்மானம் நிறைவேற்றப்பட்டு, தீவிரப் போராட்டம் முன்னெடுக்கப்படும். இதற்குத் தமிழக அரசு உடனடியாகப் பதிலளிக்க வேண்டும்.

தமிழகத்தில் 'ஆட்சிகள் மாறினாலும் காட்சிகள் மாறவில்லை' என்பதற்கு ஏற்ப, விசாரணைக் கைதிகளின் மரணங்கள் தொடர்ந்து அரங்கேறி வருகின்றன. நாகர்கோவில் மற்றும் கன்னியாகுமரி நீதிமன்றக் காவலில் வைக்கப்பட்டிருந்த மாற்றுத்திறனாளி ஒருவர் அடித்துக் கொல்லப்பட்டதாக வெளியாகும் செய்திகள் அதிர்ச்சியளிக்கின்றன. கைதிகள் எத்தகைய குற்றங்களைச் செய்திருந்தாலும், அவர்களைச் சட்டத்திற்குப் புறம்பாகத் துன்புறுத்திக் கொல்லும் அதிகாரம் காவல்துறைக்கு இல்லை. தவெக அரசு பொறுப்பேற்ற இந்த குறுகிய காலத்திற்குள்ளேயே தமிழகத்தில் ஐந்து இடங்களில் காவல் மரணங்கள் நிகழ்ந்துள்ளதாக ஊடகங்கள் வாயிலாகத் தெரிகிறது.

முதலமைச்சர் ஜோசப் விஜய் நாள்தோறும் 9 மணி நேரம் அலுவலகத்தில் இருக்கிறார் என்பது முக்கியமல்ல; அந்த நேரத்தில் மக்களுக்குப் பயனுள்ள வகையில் என்ன செய்கிறார் என்பதே முக்கியம். இந்த மரணங்களுக்குக் காரணமானவர்கள் மீது தகுந்த நடவடிக்கை எடுக்கத் தவறிய தற்போதைய அரசின் நிர்வாகச் சீர்கேட்டை வன்மையாகக் கண்டிக்கிறேன்.

மத்திய அரசு யு.ஜி.சி (UGC), ஏ.ஐ.சி.டி.இ (AICTE) உள்ளிட்ட ஐந்து முக்கியக் கல்வி அமைப்புகளைக் கலைத்துவிட்டு, அவற்றுக்குப் பதிலாக ஒருங்கிணைந்த 'தேசிய உயர்கல்விக் குழுமம்' (National Council for Higher Education) அமைப்பதை நாடாளுமன்றத்தில் நாங்கள் வரவேற்றோம். இருப்பினும், இந்த இடைப்பட்ட மாற்றுக் காலத்தில் (Transition Period) பல்கலைக்கழகங்களுக்குக் கிடைக்கும் நிதியாதாரங்களில் தேக்கநிலை ஏற்பட்டுவிடுமோ என்ற அச்சம் எழுந்துள்ளது. இந்தியாவிலேயே அதிகப்படியாக 56 பல்கலைக்கழகங்களைக் கொண்டுள்ள மாநிலம் தமிழ்நாடு ஆகும்.

'ரூசா' (RUSA) போன்ற திட்டங்களின் கீழ் தமிழக உயர்கல்வித் துறைக்கு ஆண்டுக்கு ₹300 முதல் ₹400 கோடி வரை மூலதனச் செலவினங்களுக்கான (Capital Expenditure) நிதி மத்திய அரசிடமிருந்து கிடைத்து வந்தது. இந்த புதிய ஒருங்கிணைப்பு மாற்றத்தால் அத்தகைய நிதியைப் பெறுவதில் பெரும் தாமதம் ஏற்பட வாய்ப்புள்ளது. புதிய தேசியக் குழுமத்தில் மாநிலங்களுக்கான பிரதிநிதித்துவம் மற்றும் அதிகாரங்கள் குறித்து அதன் வரைவுத் திட்டத்தில் (Draft) உரிய வெளிப்படைத்தன்மை இல்லை. இதனைத் தட்டிக்கேட்டு மாநில உரிமைகளை நிலைநாட்ட வேண்டிய தமிழக உயர்கல்வித்துறை அமைச்சர் விஸ்வநாதன், பள்ளிகளுக்குச் சென்று நடனமாடுவதிலேயே மும்முரமாக இருக்கிறாரே தவிர, இந்த முக்கியப் பிரச்சினை குறித்து இதுவரை வாய் திறக்கவில்லை. தமிழக உயர்கல்வித் துறை இதில் உடனடியாகத் தலையிட்டுப் பல்கலைக்கழகங்களின் நலனைப் பாதுகாக்க வேண்டும்.

தங்கள் ஆட்சியில் ஊழலே இல்லை என முதலமைச்சர் விஜய் கூறி வருகிறார். ஆனால், மினி பஸ்கள் மற்றும் ஆம்னி பஸ்களுக்குப் போக்குவரத்து அனுமதி வழங்க, பேருந்து ஒன்றுக்கு ₹2.6 லட்சம் வரை அமைச்சரின் செயலாளர் லஞ்சம் வாங்கியதாக ஊடகங்களில் செய்திகள் வெளியாகியுள்ளன. 'லஞ்சம் வாங்கினால் இந்த எண்ணைத் தொடர்பு கொள்ளுங்கள்' என அரசு விளம்பரம் செய்வது வெறும் போலித்தனமான நாடகமே ஆகும்.

அதிமுகவில் இருந்து தவெக-விற்கு சட்டமன்ற உறுப்பினர்கள் தாவிய விவகாரத்தில், பெருமளவில் குதிரை பேரமும், பணப் பரிமாற்றமும் நடைபெற்றுள்ளதாக நீதிமன்ற வளாகம் வரை பேசப்பட்டு வருகிறது. 'இக்குதிரை பேரப் பிரச்சினைக்குத் தீர்வு காணும் வரை இடைத்தேர்தலை நடத்தக் கூடாது' என உயர் நீதிமன்றமே தற்போது உத்தரவிட்டுள்ளது. கட்சி மாறிய 6 சட்டமன்ற உறுப்பினர்களின் தற்போதைய நிலைப்பாடு மற்றும் அவர்களது உரிமைகள் குறித்து அரசு உரிய விளக்கம் அளிக்க வேண்டும். தவெக அரசின் கூட்டணிக் கட்சிகளான சிபிஐ (CPI) மற்றும் சிபிஎம் (CPM) ஆகிய இடதுசாரி அமைப்புகளே தங்களது மனச்சாட்சிக்குக் கட்டுப்பட்டு இந்தக் குதிரை பேரத்தைக் கடுமையாக விமர்சித்துள்ளன. அவர்களின் அந்த நேர்மையான அரசியல் நிலைப்பாட்டை நாங்கள் வரவேற்கிறோம்.