விழுப்புரம் புதிய பேருந்து நிலையம் அருகில் உள்ள நகராட்சி திடல் மற்றும் நடுரோட்டில் திரியும் மாடுகளால் வாகன ஓட்டிகளும், பொதுமக்களும் கடும் அவதிக்குள்ளாகி வருகின்றனர்.
விழுப்புரம் புதிய பேருந்து நிலையம் மாவட்டத்தின் பிரதான பேருந்து நிலையமாக விளங்குகிறது. இங்கு தினமும் ஆயிரக்கணக்கான பேருந்துகளும், ஏராளமான வாகனங்களும் வந்து செல்கின்றன. இந்நிலையில், பேருந்து நிலையம் அருகே நகராட்சி திடல் மற்றும் சாலையின் நடுவே கூட்டம் கூட்டமாக மாடுகள் சுற்றித் திரிவதால் போக்குவரத்து நெரிசல் ஏற்பட்டு வருகிறது.
குறிப்பாக, இருசக்கர வாகன ஓட்டிகள் மாடுகள் மீது மோதி விபத்துக்குள்ளாகும் சம்பவங்கள் அடிக்கடி நடைபெற்று வருகின்றன. மேலும், பொதுமக்கள் நடந்து செல்ல முடியாமலும் அச்சத்துடன் செல்லும் நிலை உள்ளது.
எனவே, நடுரோட்டில் சுற்றித்திரியும் மாடுகளைப் பிடித்து உரிய நடவடிக்கை எடுக்க வேண்டும் எனவும், மாடுகளின் உரிமையாளர்களுக்கு அபராதம் விதிக்க வேண்டும் எனவும் பொதுமக்களும் சமூக ஆர்வலர்களும் நகராட்சி நிர்வாகத்திற்கும் மாவட்ட நிர்வாகத்திற்கும் கோரிக்கை விடுத்துள்ளனர்.