விழுப்புரம் மாவட்டம், திருவெண்ணெய்நல்லூர் சுற்றுவட்டாரப் பகுதிகளில் நிலவி வரும் தொடர் மின்வெட்டைக் கண்டித்து பாட்டாளி மக்கள் கட்சி (பாமக) சார்பில் நடத்தவிருந்த முற்றுகைப் போராட்டம் தற்காலிகமாக ஒத்திவைக்கப்பட்டுள்ளது.
திருவெண்ணெய்நல்லூரில் தொடர் மின் தடையைக் கண்டித்து, விழுப்புரம் மத்திய மாவட்டச் செயலாளர் பாலசக்தி தலைமையில் நாளை (23-ஆம் தேதி) மின்வாரிய செயற்பொறியாளர் அலுவலகத்தை முற்றுகையிட்டு போராட்டம் நடத்தப்படும் என அறிவிக்கப்பட்டிருந்தது.
இதனைத் தொடர்ந்து, செயற்பொறியாளர் மாதேஸ்வரன் தலைமையில் இன்று அமைதிக் கூட்டம் நடைபெற்றது. கூட்டத்தில், அப்பகுதிக்கு தடையின்றி சீரான மின்சாரம் வழங்க உரிய நடவடிக்கைகள் எடுக்கப்படும் என்று மின்வாரிய அதிகாரிகள் உறுதியளித்தனர். இதனையடுத்து, திட்டமிடப்பட்டிருந்த முற்றுகைப் போராட்டம் தற்காலிகமாக ஒத்திவைக்கப்படுவதாக அறிவிக்கப்பட்டுள்ளது.