விருதுநகர் மாவட்டம், வத்திராயிருப்பு புதிய பேருந்து நிலையத்தில் சட்டமன்ற உறுப்பினர் கார்த்திக் திடீர் ஆய்வு மேற்கொண்டார். அப்போது, பேருந்து நிலையத்திற்குள் நிறுத்தப்பட்டிருந்த வாகனங்களுக்கு அபராதம் விதிக்கவும், அனைத்து பேருந்துகளும் உள்ளே வந்து செல்ல உரிய நடவடிக்கை எடுக்கவும் அதிகாரிகளுக்கு அவர் உத்தரவிட்டார்.
தமிழ்நாட்டில் முதலமைச்சர், அமைச்சர்கள் மற்றும் சட்டமன்ற உறுப்பினர்கள் பொதுமக்கள் பயன்படும் மருத்துவமனைகள், பள்ளிகள் மற்றும் பேருந்து நிலையங்கள் உள்ளிட்ட அரசு அலுவலகங்களில் ஆய்வு மேற்கொண்டு, குறைகளை நிவர்த்தி செய்து வருகின்றனர். இதன் ஒரு பகுதியாக, ஸ்ரீவில்லிபுத்தூர் அருகே உள்ள வத்திராயிருப்பு பேரூராட்சிப் பகுதிக்கு உட்பட்ட புதிய பேருந்து நிலையத்தில் சட்டமன்ற உறுப்பினர் கார்த்திக் ஆய்வு நடத்தினார்.
இந்த ஆய்வின்போது, பேருந்து நிலையத்தில் தனியார் வேன்கள், கார்கள் மற்றும் இருசக்கர வாகனங்கள் நிறுத்தப்பட்டிருப்பதைக் கண்டு அவர் அதிர்ச்சியடைந்தார். உடனடியாக சம்பந்தப்பட்ட அதிகாரிகளைத் தொலைபேசியில் தொடர்பு கொண்டு பேசிய அவர், 'இது பேருந்து நிலையம் போல் தெரியவில்லை, வாகனங்கள் நிறுத்தும் இடமாகவே தெரிகிறது' என்று தெரிவித்தார். மேலும், பேருந்து நிலையத்தில் அனுமதியின்றி நிறுத்தப்பட்டுள்ள வாகனங்களுக்கு அபராதம் விதிக்கவும், இனி அங்கு வாகனங்கள் நிறுத்தப்படுவதைத் தடுத்து முழுமையான பராமரிப்புப் பணிகளை மேற்கொண்டு மக்கள் பயன்பாட்டிற்கு கொண்டு வரவும் அவர் உத்தரவிட்டார்.
தொடர்ந்து பேசிய அவர், வத்திராயிருப்பு பேருந்து நிலையத்திற்கு அனைத்துப் பேருந்துகளும் உள்ளே வந்து செல்வதை உறுதி செய்யுமாறு போக்குவரத்துத்துறை அதிகாரியிடம் வலியுறுத்தினார்.