அரியலூர் மாவட்டத்தில் வனப்பரப்பை 33 சதவீதமாக உயர்த்தும் நோக்கில், நடப்பு நிதியாண்டில் மொத்தம் 6,26,500 மரக்கன்றுகள் நட இலக்கு நிர்ணயிக்கப்பட்டுள்ளதாக மாவட்ட ஆட்சித்தலைவர் திருமதி. ந. மிருணாளினி, இ.ஆ.ப., தெரிவித்தார்.
அரியலூர் வனக்கோட்டம் மற்றும் ‘பசுமை தமிழ்நாடு இயக்கம்’ சார்பில், புதுப்பாளையம் கிராமத்தில் அமைந்துள்ள ராம்கோ சிமெண்ட் நிறுவன வளாகத்தில் மாபெரும் மரக்கன்றுகள் நடும் விழா நடைபெற்றது. இந்நிகழ்வில் மாவட்ட ஆட்சித்தலைவர் திருமதி. ந. மிருணாளினி கலந்துகொண்டு, மரக்கன்றுகளை நட்டு திட்டத்தைத் தொடங்கி வைத்தார்.
பின்னர் மாவட்ட ஆட்சியர் பேசியதாவது:
"இந்திய வனக் கொள்கையின்படி நாட்டின் மொத்த நிலப்பரப்பில் 33 சதவீதம் பசுமைப் போர்வையாக இருக்க வேண்டும் என இலக்கு நிர்ணயிக்கப்பட்டுள்ளது. தற்போது அரியலூர் மாவட்டத்தில் வனப்பரப்பு மற்றும் பசுமைப் பரப்பு 20.22 சதவீதமாக உள்ளது. இதனை 33 சதவீதமாக உயர்த்தும் பொருட்டு TBGPCCR மற்றும் பசுமை தமிழ்நாடு இயக்கம் (GTM) உள்ளிட்ட பல்வேறு திட்டங்களின் கீழ் ஆண்டுதோறும் மரக்கன்றுகள் உற்பத்தி செய்யப்பட்டு நடவு செய்யப்பட்டு வருகின்றன."
திட்ட வாரியான விவரங்கள்:
அரியலூர் மாவட்டத்தின் 2026-27-ஆம் ஆண்டிற்கான செயல் திட்டத்தின் கீழ் பல்வேறு துறைகள் வாயிலாக மரக்கன்றுகள் நடப்பட உள்ளன:
- TBGPCCR திட்டம்: 92,500 மரக்கன்றுகள்
- பசுமை தமிழ்நாடு இயக்கம் (GTM): 70,000 மரக்கன்றுகள்
- GTM மற்றும் மகாத்மா காந்தி தேசிய ஊரக வேலை உறுதித் திட்டம் (2025-26): 1,00,000 மரக்கன்றுகள்
- GTM மற்றும் மகாத்மா காந்தி தேசிய ஊரக வேலை உறுதித் திட்டம் (2026-27): 1,00,000 மரக்கன்றுகள்
- மாவட்ட ஊரக வளர்ச்சி முகமை (DRDA): 2,64,000 மரக்கன்றுகள்
இவ்வாறாக மொத்தம் 6,26,500 மரக்கன்றுகள் உற்பத்தி செய்யப்பட்டு விவசாயிகள், பொது இடங்கள், அரசு மற்றும் தனியார் நிறுவனங்கள் மூலம் நடவு செய்யப்பட உள்ளன. மாவட்ட நிர்வாகத்தின் இந்த முன்னெடுப்பில் பொதுமக்களும் பங்கேற்று, அரியலூரை பசுமை நிறைந்த மாவட்டமாக மாற்ற முழு ஒத்துழைப்பு அளிக்க வேண்டும் என்று மாவட்ட ஆட்சியர் கேட்டுக்கொண்டார்.
இந்நிகழ்வில் மாவட்ட வன அலுவலர் திரு. த. இளங்கோவன், அரியலூர் வருவாய் கோட்டாட்சியர் செல்வி பிரேமி, வனத்துறை அலுவலர்கள், ராம்கோ நிறுவனப் பணியாளர்கள் மற்றும் கல்லூரி மாணவர்கள் உள்ளிட்ட பலர் கலந்துகொண்டனர்.