திண்டுக்கல் மாவட்டம் நத்தம் மற்றும் அதன் சுற்றுவட்டாரப் பகுதிகளில் நேற்று பலத்த மழை பெய்தது. இதன் காரணமாக அப்பகுதியில் உள்ள பாலாற்றில் வெள்ளப்பெருக்கு ஏற்பட்டுள்ளது.
நத்தம் பகுதியில் நேற்று ஒரே நாளில் 97.50 மி.மீ மழை பதிவானது. குறிப்பாக, மணக்காட்டூரில் சுமார் 2.30 மணி நேரம் நீடித்த கனமழையால், கரந்தமலை பாலாற்றில் நீர்வரத்து அதிகரித்து வெள்ளப்பெருக்கு ஏற்பட்டுள்ளது.
இதனைத் தொடர்ந்து, வட்டாட்சியர் டேனியல் தலைமையில் வருவாய்த்துறையினர் அப்பகுதியில் நேரில் ஆய்வு மேற்கொண்டனர். மேலும், ஆற்றங்கரையோர மற்றும் தாழ்வான பகுதிகளில் வசிக்கும் மக்களுக்கு பாதுகாப்பு எச்சரிக்கைகளும் விடுக்கப்பட்டுள்ளன.
தொடர் மழை காரணமாக இப்பகுதியில் உள்ள கண்மாய்கள் மற்றும் குளங்கள் வேகமாக நிரம்பி வருவதால், விவசாயிகளும் பொதுமக்களும் மிகுந்த மகிழ்ச்சியடைந்துள்ளனர்.