புதுக்கோட்டை மாவட்டத்தில் முன்னாள் அமைச்சர் சி.விஜயபாஸ்கருக்குச் சொந்தமான குவாரிகளில் முறைகேடுகள் நடந்துள்ளதாகக் கூறி, அங்கு உரிய ஆய்வு நடத்தப்பட வேண்டும் என தமிழர் கழகத்தின் மாநிலச் செயலாளர் மணிகண்டன் கோரிக்கை விடுத்துள்ளார்.
புதுக்கோட்டையில் உள்ள எஸ்டிபிஐ கட்சி அலுவலகத்தில் செய்தியாளர்களைச் சந்தித்துப் பேசிய அவர், கடந்த 2007-ஆம் ஆண்டு முதல் அதிகாரிகளைத் தவறாகப் பயன்படுத்தி முறைகேடான பட்டா எண்களைப் பெற்று, அரசுப் புறம்போக்கு நிலங்கள் மற்றும் குளத்துப் பகுதிகளில் குவாரிகள் நடத்தப்பட்டு வருவதாகக் குற்றம் சாட்டினார்.
மேலும், அரசு அனுமதித்த அளவுக்கு மேல் கனிம வளங்கள் வெட்டி எடுக்கப்படுவதாகவும், தவறான பட்டா எண்கள் மூலம் அரசுக்கு வருவாய் இழப்பு ஏற்படுத்தப்பட்டு வருவதாகவும் அவர் தெரிவித்தார். எனவே, வருவாய்த் துறை அதிகாரிகள் உடனடியாகத் தலையிட்டு இது குறித்து முறையான விசாரணை நடத்தி நடவடிக்கை எடுக்க வேண்டும் என அவர் வலியுறுத்தினார்.









