ஈரோடு மாவட்டம், பவானிசாகர் அணைக்கு நீர்வரத்து கணிசமாக அதிகரித்துள்ளதைத் தொடர்ந்து, அணையின் நீர்மட்டம் கடந்த மூன்று நாட்களில் 5 அடி உயர்ந்துள்ளது.
அணைப் பிடிப்புப் பகுதிகளில் கடந்த சில நாட்களாகத் தொடர் மழை பெய்து வருவதால், பவானிசாகர் அணைக்கு நீர்வரத்து வினாடிக்கு 5,838 கன அடியிலிருந்து 10,283 கன அடியாக உயர்ந்துள்ளது. இதன் காரணமாக, அணையின் நீர்மட்டம் தற்போது 69.50 அடியாகக் (மொத்த கொள்ளளவு 105 அடி) பதிவாகியுள்ளது.
மேலும், அணையின் நீர் இருப்பு 10.74 டி.எம்.சியாகக் (மொத்த கொள்ளளவு 32.8 டி.எம்.சி) உள்ளது. அணையில் இருந்து குடிநீர் மற்றும் பாசனத் தேவைக்காக வினாடிக்கு 5 கன அடி நீர் வெளியேற்றப்பட்டு வருகிறது. தொடர் மழை காரணமாக நீர்மட்டம் உயர்ந்து வருவது விவசாயிகளிடையே மகிழ்ச்சியை ஏற்படுத்தியுள்ளது.