விருதுநகர் மாவட்டம் வத்திராயிருப்பு அருகேயுள்ள கூமாபட்டி பகுதியில் அரசு பேருந்து மீது இருசக்கர வாகனம் மோதிய விபத்தில், ஆட்டோ ஓட்டுநர் சம்பவ இடத்திலேயே உயிரிழந்தார்.
வத்திராயிருப்பு அடுத்த கூமாபட்டி சர்ச் தெருவைச் சேர்ந்தவர் முனீஸ்வரன் (35). சொந்தமாக ஆட்டோ ஓட்டி பிழைப்பு நடத்தி வந்த இவர், சம்பவத்தன்று மதியம் தனது இருசக்கர வாகனத்தில் கூமாபட்டியில் இருந்து வத்திராயிருப்பு நோக்கிச் சென்று கொண்டிருந்தார். அப்போது, எதிரே நெடுங்குளம் நோக்கிச் சென்ற அரசு நகரப் பேருந்து எதிர்பாராதவிதமாக அவரது இருசக்கர வாகனத்தின் மீது மோதியது.
இந்த கோர விபத்தில் பலத்த காயமடைந்த முனீஸ்வரனை அப்பகுதி மக்கள் மற்றும் காவல்துறையினர் மீட்டு, வத்திராயிருப்பு அரசு மருத்துவமனைக்கு அனுப்பி வைத்தனர். எனினும், மருத்துவமனைக்குச் செல்லும் வழியிலேயே அவர் உயிரிழந்ததாக மருத்துவர்கள் உறுதிப்படுத்தினர்.
இந்த விபத்து குறித்து வழக்குப்பதிவு செய்த கூமாபட்டி போலீசார், பேருந்து ஓட்டுநரான கோட்டையூரைச் சேர்ந்த பால்சாமி என்பவரைக் கைது செய்து தீவிர விசாரணை நடத்தி வருகின்றனர். உயிரிழந்த முனீஸ்வரனுக்கு நிவேதா என்ற மனைவியும், சிவராமன் (5) என்ற மகனும் உள்ளனர்.