வாரத்தின் முதல் வர்த்தக நாளான திங்கள்கிழமை சென்னையில் ஆபரணத் தங்கத்தின் விலை மீண்டும் உயர்ந்துள்ளது. இன்று ஒரு சவரன் (22 காரட்) தங்கத்தின் விலை ரூ.240 உயர்ந்து ரூ.1,06,000-ஆகவும், ஒரு கிராம் ரூ.30 உயர்ந்து ரூ.13,250-ஆகவும் நிர்ணயிக்கப்பட்டுள்ளது.
கடந்த வர்த்தக நாளில் ஒரு சவரன் தங்கம் ரூ.1,05,760-க்கு விற்பனையான நிலையில், இன்று ஏற்பட்ட உயர்வு நகை வாங்கத் திட்டமிட்டிருந்த பொதுமக்களுக்கு கூடுதல் செலவை ஏற்படுத்தியுள்ளது.
சர்வதேச சந்தையில் தங்கத்தின் விலை ஏற்றம், உலகளாவிய பொருளாதார சூழ்நிலை மற்றும் முதலீட்டாளர்கள் பாதுகாப்பான முதலீடாக தங்கத்தை அதிகம் தேர்வு செய்வது போன்ற காரணங்களால் விலையில் மாற்றம் ஏற்பட்டுள்ளதாக சந்தை வட்டாரங்கள் தெரிவிக்கின்றன.
இதற்கிடையில், வெள்ளி விலையில் மாற்றமின்றி ஒரு கிராம் ரூ.235 மற்றும் ஒரு கிலோ ரூ.2,35,000 என்ற நிலையில் தொடர்கிறது. தங்க விலை தொடர்ந்து ஏற்ற, இறக்கங்களை சந்தித்து வருவதால், நகை வாங்குவோர் தினசரி விலை நிலவரத்தை கவனித்து வாங்குவது நல்லது என்று வணிகர்கள் அறிவுறுத்துகின்றனர்.