திருவாரூர் மாவட்டத்தில் பெய்துவரும் தொடர் கனமழை காரணமாக, சுமார் 500 ஏக்கர் பரப்பளவிலான சம்பா நெற்பயிர்கள் நீரில் மூழ்கியுள்ளன. இதனால் பயிர்கள் அழுகும் அபாயம் ஏற்பட்டுள்ளதாக விவசாயிகள் கவலை தெரிவித்துள்ளனர்.
திருவாரூர் மாவட்டத்தில் சம்பா சாகுபடிக்காக கடந்த செப்டம்பர் 1-ஆம் தேதி தண்ணீர் திறக்கப்பட்டது. அதனைத் தொடர்ந்து, மாவட்டம் முழுவதும் சுமார் ஒன்றரை லட்சம் ஏக்கர் பரப்பளவில் விவசாயிகள் நேரடி விதைப்பில் ஈடுபட்டனர். இந்நிலையில், கடந்த 17-ஆம் தேதி முதல் பல்வேறு பகுதிகளில் கனமழை பெய்து வருகிறது.
இதன் காரணமாக, ஓவர்சேரி, கோவில்பத்து, அண்டூர், வேர்க்குடி, தண்ணீர்குண்ணம், சாத்தங்குடி உள்ளிட்ட 7 கிராமங்களில் நேரடி விதைப்பு செய்யப்பட்டு 15 நாட்களுக்கு மேல் ஆன சம்பா பயிர்கள் பாதிக்கப்பட்டுள்ளன. கடந்த மூன்று நாட்களாக பெய்துவரும் கனமழையால் இக்கிராமங்களில் உள்ள சுமார் 500 ஏக்கர் பரப்பளவிலான பயிர்கள் நீரில் மூழ்கி குளம் போல் காட்சியளிக்கின்றன.