தமிழகத்தில் விவசாயிகள் பயன்பெறும் வகையில், தொடக்க வேளாண்மை கூட்டுறவு கடன் சங்கங்கள் மூலம் விதைகள், ரசாயன உரங்கள் உள்ளிட்ட விவசாய இடுபொருட்களை ரொக்கமாக வாங்க புதிய வசதி ஏற்படுத்தப்பட்டுள்ளது. இதன் மூலம் கூட்டுறவு சங்கங்களில் உறுப்பினர்களாக இல்லாத விவசாயிகளும் இந்த வசதியைப் பயன்படுத்த முடியும். தமிழகத்தில் செயல்பட்டு வரும் தொடக்க வேளாண்மை கூட்டுறவு கடன் சங்கங்கள் மூலம் விவசாயிகளுக்கு பயிர் சாகுபடிக்குத் தேவையான நிதி குறுகிய கால பயிர்க்கடனாக வழங்கப்பட்டு வருகிறது.இந்த கடனின் ஒரு பகுதியாக விதைகள், ரசாயன உரங்கள் உள்ளிட்ட இடுபொருட்களும் விவசாயிகளுக்கு வழங்கப்பட்டு வருகின்றன. இந்நிலையில், விவசாயிகள் அனைவரும் பயன்பெறும் வகையில், விதைகள் மற்றும் ரசாயன உரங்கள் உள்ளிட்ட இடுபொருட்களை ரொக்கப்பணம் செலுத்தி வாங்குவதற்கும் கூட்டுறவுத்துறை ஏற்பாடு செய்துள்ளது.
MRP-க்கு மிகாமல் விற்பனை
இந்த புதிய வசதியின்படி, விவசாயிகள் தங்களது சாகுபடி நிலம் தொடர்பான ஆவணங்களின் அடிப்படையில் தேவையான விதைகள் மற்றும் உரங்களை கூட்டுறவு சங்கங்களில் வாங்கிக்கொள்ளலாம். மேலும், விற்பனை செய்யப்படும் விதைகள் மற்றும் உரங்களின் விலை நிர்ணயிக்கப்பட்ட அதிகபட்ச சில்லறை விலையான (MRP)-ஐ விட அதிகமாக இருக்கக்கூடாது என கூட்டுறவுத்துறை தெரிவித்துள்ளது.
கூட்டுறவு சங்க உறுப்பினர்கள் அல்லாதவர்களுக்கும் வாய்ப்பு
இதுவரை கூட்டுறவு சங்கங்களில் உறுப்பினர்களாக இல்லாத விவசாயிகளும் உடனடியாக உறுப்பினராக சேர்ந்து, குறைந்த வட்டியில் வழங்கப்படும் பயிர்க்கடனைப் பெற்று பயன்பெறலாம். இதன் மூலம் பயிர்க்கடன் மட்டுமின்றி, விதைகள் மற்றும் ரசாயன உரங்களையும் பெறுவதற்கான வாய்ப்பு உள்ளது.
விவசாயிகளுக்கு பயனளிக்கும் புதிய நடைமுறை
கூட்டுறவு சங்கங்கள் மூலம் விவசாய இடுபொருட்களை ரொக்கமாக வாங்கும் வசதி ஏற்படுத்தப்பட்டுள்ளதால், சாகுபடி காலத்தில் விவசாயிகளுக்கு தேவையான விதைகள் மற்றும் உரங்களை எளிதாகப் பெற்றுக்கொள்ள உதவும் என எதிர்பார்க்கப்படுகிறது. விவசாயிகள் அருகிலுள்ள தொடக்க வேளாண்மை கூட்டுறவு கடன் சங்கங்களை அணுகி இந்த வசதியைப் பயன்படுத்திக்கொள்ளலாம்.