கரூர் மாவட்டம், கருப்பத்தூரில் காவிரி ஆற்றின் கரையில் அமைந்துள்ள தமிழகத்தின் முதல் ஐயப்பன் கோவிலில், கார்த்திகை மாதப் பிறப்பை முன்னிட்டு 5,000-க்கும் மேற்பட்ட பக்தர்கள் மாலை அணிந்து தங்களது மண்டல விரதத்தைத் தொடங்கினர்.
கிருஷ்ணராயபுரம் அருகே உள்ள புகழ்பெற்ற இந்தக் கோவிலில், ஆண்டுதோறும் கார்த்திகை முதல் நாளில் ஐயப்ப பக்தர்கள் மாலை அணிந்து விரதத்தைத் தொடங்குவது வழக்கம். இதையொட்டி, இன்று காலை கருப்பத்தூர், லாலாபேட்டை, கிருஷ்ணராயபுரம், மாயனூர், புனவாசிப்பட்டி, அய்யர்மலை மற்றும் திருச்சி மாவட்டத்தின் மணப்பாறை, முசிறி, தொட்டியம் உள்ளிட்ட பல்வேறு பகுதிகளில் இருந்து ஆயிரக்கணக்கான பக்தர்கள் வருகை தந்தனர்.
பக்தர்கள் காவிரி ஆற்றில் புனித நீராடி, கருப்பு வேஷ்டி அணிந்து, குருசாமிகளின் முன்னிலையில் மாலை அணிந்து கொண்டனர். 'சரணம் ஐயப்பா' என்ற பக்தி முழக்கத்துடன் கோவில் வளாகமே விழாக்கோலம் பூண்டிருந்தது. முதன்முறையாக சபரிமலைக்குச் செல்லும் கன்னி சாமிகள் பலரும் இதில் பங்கேற்றனர். இதேபோல், குளித்தலை ஐயப்பன் கோவிலிலும் 1,000-க்கும் மேற்பட்ட பக்தர்கள் மாலை அணிந்து விரதத்தைத் தொடங்கினர். பக்தர்களுக்கு கோவில் நிர்வாகம் சார்பில் அன்னதானம் வழங்கப்பட்டது.









