திருவண்ணாமலை அருணாசலேஸ்வரர் கோவிலில் கார்த்திகை தீபத் திருவிழா கொடியேற்றத்துடன் தொடங்கி நடைபெற்று வருகிறது. பத்து நாட்கள் நடைபெறும் இவ்விழாவின் ஒவ்வொரு நாளும் காலை மற்றும் மாலை வேளைகளில் சுவாமிகள் பல்வேறு வாகனங்களில் எழுந்தருளி நான்கு மாட வீதிகளில் உலா வந்து பக்தர்களுக்கு அருள்பாலித்து வருகின்றனர்.
பஞ்சமூர்த்திகள் தேரோட்டம்
விழாவின் ஏழாம் நாளான இன்று பஞ்சமூர்த்திகள் தேரோட்டம் நடைபெற்றது. முதலில் விநாயகர் தேரை ஏராளமான பக்தர்கள் வடம் பிடித்து இழுத்தனர். தொடர்ந்து முருகர் தேரையும் பக்தர்கள் உற்சாகத்துடன் இழுத்து வழிபட்டனர்.
இதையடுத்து, உண்ணாமுலை அம்மன் சமேத அண்ணாமலையார் சிறப்பு அலங்காரத்தில் பெரிய தேரில் எழுந்தருளி பக்தர்களுக்கு அருள்பாலித்தார். அப்போது, "அண்ணாமலைக்கு அரோகரா" என்ற பக்தி முழக்கத்துடன் ஆயிரக்கணக்கான பக்தர்கள் தேரை வடம் பிடித்து இழுத்து வழிபட்டனர்.
டிசம்பர் 24-ல் பரணி தீபம், மகா தீபம்
கார்த்திகை தீபத் திருவிழாவின் முக்கிய நிகழ்வான பரணி தீபம் டிசம்பர் 24-ம் தேதி அதிகாலை 4 மணிக்கு கோவில் கருவறை எதிரில் ஏற்றப்பட உள்ளது.
அதே நாளில் மாலை 6 மணிக்கு 2,668 அடி உயரம் கொண்ட அண்ணாமலையார் மலை உச்சியில் மகா தீபம் ஏற்றப்பட உள்ளது. இதற்கான ஏற்பாடுகள் கோவில் நிர்வாகம் சார்பில் மேற்கொள்ளப்பட்டு வருகின்றன.









