“நடிகர் விஜயின் ஜாதக அமைப்பு வலிமையாக இருப்பதால், அவர் பிரதமராக உயர்வதற்கு 90 சதவீதம் வாய்ப்பு உள்ளது” என்று சிவகாசியைச் சேர்ந்த அறிவியல் விஞ்ஞானி, உளவியலாளர் மற்றும் மேற்கத்திய ஜோதிடக் கணிப்பாளர் விஜய் ரிஷி தெரிவித்துள்ள கருத்து பரபரப்பை ஏற்படுத்தியுள்ளது.
விருதுநகர் மாவட்டம் சிவகாசியைச் சேர்ந்த விஜய் ரிஷி செய்தியாளர்களிடம் பேசுகையில், உலக அரசியல் சூழல், மனிதர்களின் மனநிலை மற்றும் கிரகங்களின் மாற்றம் ஆகியவற்றை அடிப்படையாகக் கொண்டு தனது மேற்கத்திய ஜோதிடக் கணிப்புகளை வெளியிட்டார்.
அவர் கூறுகையில், 2030-ஆம் ஆண்டை நோக்கி உலகளவில் போர் ஏற்படும் சூழல் உருவாகலாம் என்றும், அதனை தடுக்க உலக நாடுகள் மற்றும் இளம் தலைமுறையினர் விழிப்புணர்வுடன் செயல்பட வேண்டும் என்றும் தெரிவித்தார். நடப்பாண்டு முடியும் வரை உலக நாடுகளுக்கு இடையே பேச்சுவார்த்தைகள் தொடர்வதால், உலக மக்களுக்கு ஓரளவு நிம்மதி கிடைக்கும் என்றும் அவர் தனது கணிப்பில் கூறினார்.
2027-ஆம் ஆண்டு பிப்ரவரி மாதத்திற்குப் பிறகு உலக அரசியல் மற்றும் பல நாடுகளின் தலைமைப் பொறுப்புகளில் குறிப்பிடத்தக்க மாற்றங்கள் ஏற்படலாம் என்றும் அவர் தெரிவித்தார். வன்முறையை நோக்கிய அரசியல் பயணம் தொடர்ந்தால் பெரிய அளவிலான போர் சூழல் உருவாகும் அபாயம் இருப்பதாகவும் அவர் கருத்து தெரிவித்தார்.
மேலும், உலக அமைதியை பாதுகாக்கும் நோக்கில் பல்வேறு நாடுகளுக்கு சென்று பொதுமக்கள், மாணவர்கள், அறிவியல் விஞ்ஞானிகள் மற்றும் அமைதி ஆர்வலர்களிடம் விழிப்புணர்வு ஏற்படுத்தும் முயற்சிகளை மேற்கொள்ள உள்ளதாக விஜய் ரிஷி கூறினார்.
இந்திய அரசியலில் மாற்றம் ஏற்படும்?
65 வயதுக்கு மேற்பட்டவர்களிடம் நீண்டகால அரசியல் அதிகாரத்தை ஒப்படைப்பது குறித்து உலக நாடுகள் மறுபரிசீலனை செய்ய வேண்டும் என்றும் அவர் கருத்து தெரிவித்தார். 1980 மற்றும் 2000-ஆம் ஆண்டுகளுக்குப் பிறகு பிறந்த தலைமுறையினரே எதிர்காலத்தில் உலக அரசியல் மற்றும் நிர்வாகத்தில் முக்கிய பங்காற்றுவர் என்றும் கூறினார்.
வரும் 2027 பிப்ரவரி மாதத்திற்குப் பிறகு இந்திய அரசியலில் குழப்பமான சூழலும் தலைமை மாற்றமும் ஏற்பட வாய்ப்பு இருப்பதாக அவர் தனது கணிப்பில் தெரிவித்துள்ளார்.
விஜய்க்கு 90% பிரதமர் வாய்ப்பு என கணிப்பு
நடிகர் விஜயின் ஜாதகத்தை தனது மேற்கத்திய ஜோதிட முறையில் ஆராய்ந்ததாகக் கூறிய விஜய் ரிஷி, வரும் காலங்களில் அவருக்கு அரசியல் ரீதியாக சிறிய சவால்கள் ஏற்படலாம் என்றும் தெரிவித்தார்.
அவரது குடும்பம் தொடர்பாகவோ அல்லது ஒரு பெண் தொடர்பான விவகாரத்தின் மூலமாகவோ அரசியல் சர்ச்சை ஏற்பட வாய்ப்பு இருப்பதாகவும் அவர் கணித்துள்ளார். எனினும், விஜயின் ஜாதக அமைப்பு வலிமையாக இருப்பதால், எதிர்வரும் அரசியல் சவால்களை அவர் கடந்து வருவார் என்றும் தெரிவித்துள்ளார்.
குரு மற்றும் சூரியன் உள்ளிட்ட கிரகங்களின் நிலையை அடிப்படையாகக் கொண்டு, விஜய் அரசியலில் மேலும் உயர்வதற்கான வாய்ப்பு இருப்பதாகவும், பிரதமராகும் சாத்தியம் 90 சதவீதம் வரை இருப்பதாகவும் விஜய் ரிஷி தனது மேற்கத்திய ஜோதிடக் கணிப்பில் கூறினார்.
விஜய் முன்னெடுத்துள்ள புதிய அரசியல் அணுகுமுறை வெற்றி பெறும் என்றும் அவர் நம்பிக்கை தெரிவித்துள்ளார்.
குறிப்பு: மேற்கண்ட தகவல்கள் விஜய் ரிஷி வெளியிட்ட ஜோதிடக் கணிப்புகள் மற்றும் அவரது தனிப்பட்ட கருத்துகள் மட்டுமே; அவை நிரூபிக்கப்பட்ட அரசியல் அல்லது அறிவியல் முன்னறிவிப்புகள் அல்ல.