16 வகை மருந்துகளுக்கு மத்திய அரசு தடை: என்ன காரணம்?

மனிதர்களின் உடல்நலத்திற்கு பாதிப்பை ஏற்படுத்தக்கூடும் என்ற காரணத்தால், 16 நிலையான மருந்து கலவைகள் (Fixed Dose Combinations - FDCs) மீது மத்திய அரசு உடனடி தடை விதித்துள்ளது. இந்த மருந்துகளின் உற்பத்தி, விற்பனை மற்றும் விநியோகம் இனி நாடு முழுவதும் தடை செய்யப்பட்டுள்ளது. இந்த மருந்து கலவைகள் குறித்து நிபுணர் குழு மற்றும் மருந்து தொழில்நுட்ப ஆலோசனைக் குழு (DTAB) ஆய்வு மேற்கொண்டது. ஆய்வின் முடிவில், குறிப்பிட்ட மருந்து கலவைகளுக்கு போதுமான மருத்துவ ஆதாரங்கள் இல்லை என்றும், அவை நோயாளிகளுக்கு எதிர்பார்க்கப்படும் அளவிலான சிகிச்சை பலனை வழங்குவதில்லை என்றும் கண்டறியப்பட்டது. குறிப்பாக சில ஆன்டிபயாட்டிக், வலி நிவாரணம் மற்றும் தோல் சிகிச்சை தொடர்பான மருந்து கலவைகள் இந்தத் தடையின் கீழ் கொண்டு வரப்பட்டுள்ளன. இம்மருந்துகளின் பயன்பாடு நன்மையை விட ஆபத்தை அதிகம் ஏற்படுத்தும் வாய்ப்பு உள்ளதாக நிபுணர்கள் கருத்து தெரிவித்துள்ளனர். பொதுமக்களின் நலனை கருத்தில் கொண்டு இந்த முடிவு எடுக்கப்பட்டுள்ளதாக மத்திய சுகாதாரத் துறை தெரிவித்துள்ளது. மருந்துகளின் பாதுகாப்பு மற்றும் செயல்திறனை உறுதி செய்யும் நோக்கில் அவ்வப்போது இத்தகைய ஆய்வுகள் மேற்கொள்ளப்பட்டு வருவதாகவும் கூறப்பட்டுள்ளது. இந்தத் தடை உத்தரவு உடனடியாக அமலுக்கு வந்துள்ள நிலையில், மருத்துவர்கள் மற்றும் மருந்தகங்கள் மாற்று மருந்துகளை பயன்படுத்துமாறு அறிவுறுத்தப்பட்டுள்ளனர்.