கிராவல் மண் கொள்ளையை கண்டித்து லாரிகளை சிறை பிடித்த பொதுமக்கள்... களமிறங்கிய தவெக எம்எல்ஏ!

கரூர் மாவட்டம் கிருஷ்ணராயபுரம் சட்டமன்றத் தொகுதிக்குட்பட்ட வீரராக்கியம் பகுதியில் உள்ள குளத்தில், அனுமதிக்கப்பட்ட அளவை விட கூடுதலாக கிராவல் மண் அள்ளப்படுவதைக் கண்டித்து பொதுமக்கள் லாரிகளைச் சிறைபிடித்து போராட்டத்தில் ஈடுபட்டனர். இச்சம்பவம் தொடர்பாக கிருஷ்ணராயபுரம் தவெக சட்டமன்ற உறுப்பினர் சத்யா பொதுமக்களுடன் சமரச பேச்சுவார்த்தை நடத்தினார்.

கரூர் - திருச்சி தேசிய நெடுஞ்சாலை வீரராக்கியம் பகுதியில் புதிய மேம்பாலம் அமைக்கும் பணிக்காக, இப்பகுதியில் உள்ள சுமார் 300 ஏக்கர் பரப்பளவு கொண்ட அரசு குளத்திலிருந்து கிராவல் மண் எடுக்கப்பட்டு வருகிறது. ஆனால், அரசு நிர்ணயித்த அளவைக் கடந்து அதிகளவில் மண் அள்ளப்பட்டு, வணிக நோக்கத்திற்காக லாரிகள் மூலம் வெளிப்பகுதிகளுக்குக் கொண்டு செல்லப்படுவதாகக் கூறி அப்பகுதி விவசாயிகளும் பொதுமக்களும் போராட்டத்தில் குதித்தனர்.

இந்தக் குளம் இப்பகுதியின் முக்கிய நிலத்தடி நீர் ஆதாரமாகவும், விவசாயத் தேவைகளின் மையமாகவும் விளங்குவதாகப் பொதுமக்கள் தெரிவிக்கின்றனர். விவசாயப் பணிகளுக்காக முறைப்படி அனுமதி கோரும் விவசாயிகளுக்கு மண் வழங்க மறுக்கும் நிர்வாகம், வணிக ரீதியிலான இந்த மண் எடுப்பதை அனுமதிப்பதாக அவர்கள் குற்றம் சாட்டினர். மேலும், தங்களின் தேவைகளுக்காக மண் அள்ளும்போது காவல்துறை உடனடியாக வாகனங்களைப் பறிமுதல் செய்து வழக்குப்பதிவு செய்வதாகவும், ஆனால் தனியார் தரப்பில் நடக்கும் இந்த மீறலை அதிகாரிகள் கண்டும் காணாமல் இருப்பதாகவும் அப்பகுதி பொதுமக்களில் ஒருவரான பன்னீர்செல்வம் தெரிவித்தார்.

இதიனைத் தொடர்ந்து, போராட்டம் நடைபெற்ற இடத்திற்கு வந்த சட்டமன்ற உறுப்பினர் சத்யா, பொதுமக்களிடம் சமரசப் பேச்சுவார்த்தை நடத்தி, அதிகாரிகளிடம் பேசி உரிய நடவடிக்கை எடுக்கப்படும் என்று உறுதியளித்தார். விவசாயிகளின் தொடர் போராட்டத்தைத் தொடர்ந்து, அங்கு கிராவல் மண் அள்ளும் பணி தற்காலிகமாக நிறுத்தப்பட்டு லாரிகள் திருப்பி அனுப்பப்பட்டன.