விருதுநகரில் புதிய காலணி (ஷூ) நிறுவனம் அமைப்பதற்கான பேச்சுவார்த்தைகள் தீவிரமாக நடைபெற்று வருவதாகவும், அந்தத் திட்டம் விரைவில் நடைமுறைக்கு வரும் என்றும் தொழில்துறை அமைச்சர் கீர்த்தனா உறுதி அளித்துள்ளார்.
விருதுநகர் ரோட்டரி சங்கம் சார்பில் நடைபெற்ற பாராட்டு விழாவில் சிறப்பு விருந்தினராகக் கலந்துகொண்டு அமைச்சர் கீர்த்தனா உரையாற்றினார். அப்போது அவர் பேசுகையில், தேர்தல் பிரச்சாரக் காலத்தில் தம்முடன் இணைந்து உழைத்தவர்களின் பங்களிப்பையும், அப்பகுதி மக்கள் வழங்கிய ஆதரவையும் நன்றியுடன் நினைவு கூர்வதாகத் தெரிவித்தார். மேலும், எந்தவிதப் பின்புலமும் இன்றி தனது திறமையை நம்பி எம்.எல்.ஏ. பதவியுடன், தொழில்துறை அமைச்சர் பொறுப்பையும் வழங்கிய முதலமைச்சர் ஜோசப் விஜய்க்கு அவர் தனது மனமார்ந்த நன்றியைத் தெரிவித்தார்.
தமது தாயார் போலியோவினால் பாதிக்கப்பட்டவர் என்பதைக் குறிப்பிட்ட அவர், தம்மால் இயன்ற அளவுக்குப் போலியோவால் பாதிக்கப்பட்டவர்களுக்கு மருத்துவ ரீதியாக உதவிகளைச் செய்து வருவதாகக் கூறினார். விருதுநகரில் மாற்றுத் தொழில்களுக்கான வாய்ப்புகள் குறைவாக உள்ள சூழலை மாற்ற, பி.எம். மித்ரா பூங்கா திட்டத்தின் கீழ் ஏற்கனவே இரண்டு ஆலைகள் அமைப்பதற்காக ரூ.1,600 கோடியில் புரிந்துணர்வு ஒப்பந்தங்கள் கையெழுத்திடப்பட்டுள்ளதாக அவர் குறிப்பிட்டார்.
தொடர்ந்து பேசிய அவர், ரூ.1 லட்சம் கோடி முதலீட்டில் பல்வேறு புதிய திட்டங்கள் கொண்டுவரப்படவுள்ளதாகவும், இதன் ஒரு பகுதியாக விருதுநகரில் புதிய ஷூ கம்பெனி அமைப்பது தொடர்பான பேச்சுவார்த்தைகள் தீவிரமாக நடந்து வருவதாகவும் தெரிவித்தார். தூத்துக்குடியில் ஹூண்டாய் நிறுவனத்தின் திட்டம் வருவது உறுதியாகியுள்ளதன் மூலம், தென்தமிழகம் முழுவதும் மற்றும் குறிப்பாக விருதுநகர் மாவட்டத்தில் ஏராளமான வேலைவாய்ப்புகள் உருவாக்கப்படும் என்றும் அவர் கூறினார்.