குன்னம் அருகே காடூரில் செயல்பட்டு வரும் அரசு நேரடி நெல் கொள்முதல் நிலையத்தில், விவசாயிகளிடம் நெல் மூட்டை ஒன்றுக்கு ரூ.40 வீதம் பணம் பெறப்படுவதாக கூறப்படும் வீடியோ சமூக வலைதளங்களில் பரவி பரபரப்பை ஏற்படுத்தியுள்ளது.
137 நெல் மூட்டைகளுக்கு ரூ.5,480?
வசிஷ்டபுரம் கிராமத்தைச் சேர்ந்த விவசாயி அன்பழகன், தான் சாகுபடி செய்த நெல்லை விற்பனை செய்வதற்காக காடூரில் உள்ள அரசு நேரடி நெல் கொள்முதல் நிலையத்திற்கு கொண்டு சென்றதாக கூறப்படுகிறது. அங்கு 40 கிலோ எடை கொண்ட 137 நெல் மூட்டைகள் கொள்முதல் செய்யப்பட்டதாகவும், ஒரு மூட்டைக்கு ரூ.40 வீதம் பணம் வழங்க வேண்டும் எனக் கூறப்பட்டதாகவும் தெரிவிக்கப்படுகிறது.
இதன்படி மொத்தம் ரூ.5,480 வழங்கப்பட்டதாக கூறப்படுகிறது.
பணம் வழங்கும் காட்சிகள் சமூக வலைதளங்களில்
இந்த தொகையை அங்கு பட்டய கிளார்க்காக பணியாற்றி வரும் கோபி என்பவர் மூலம், காவலாளியாக பணிபுரியும் செங்குணம் கிராமத்தைச் சேர்ந்த பிச்சப்பிள்ளை என்பவரிடம் விவசாயி வழங்கியதாக கூறப்படும் காட்சிகள் வீடியோவில் இடம்பெற்றுள்ளதாக தெரிவிக்கப்படுகிறது. இந்த வீடியோ தற்போது சமூக வலைதளங்களில் பரவி வருகிறது. இதனால் காடூர் அரசு நேரடி நெல் கொள்முதல் நிலையத்தில் விவசாயிகளிடம் முறைகேடாக பணம் வசூலிக்கப்படுகிறதா? என்ற கேள்வி எழுந்துள்ளது.
“கடும் சிரமத்துக்கு பிறகும் பணம் கேட்பது வேதனை”
இதுகுறித்து விவசாயிகள் கூறுகையில், உரங்களை கூடுதல் விலைக்கு வாங்கி, மயில், காட்டுப்பன்றி, மான் உள்ளிட்ட வனவிலங்குகளிடமிருந்து பயிர்களை பாதுகாத்து, பல்வேறு சிரமங்களுக்கு இடையே நெல் சாகுபடி செய்து அறுவடை செய்வதாக தெரிவித்தனர். அதன்பிறகு அரசு நேரடி நெல் கொள்முதல் நிலையத்திற்கு நெல்லை கொண்டு வந்தபோதும் பணம் கேட்கப்படுவதாக கூறப்படுவது வேதனை அளிப்பதாக அவர்கள் தெரிவித்தனர்.
உரிய விசாரணை நடத்த கோரிக்கை
காடூர் அரசு நேரடி நெல் கொள்முதல் நிலையத்தில் விவசாயிகளிடம் பணம் பெறப்பட்டதாக கூறப்படும் குற்றச்சாட்டு குறித்து சம்பந்தப்பட்ட அதிகாரிகள் உரிய விசாரணை நடத்த வேண்டும் என விவசாயிகள் கோரிக்கை விடுத்துள்ளனர். வீடியோவில் இடம்பெற்றுள்ள தகவல்களின் உண்மைத் தன்மையை ஆய்வு செய்து, முறைகேடு நடைபெற்றிருப்பது உறுதி செய்யப்பட்டால் சம்பந்தப்பட்டவர்கள் மீது கடுமையான நடவடிக்கை எடுக்க வேண்டும் என்றும் அவர்கள் வலியுறுத்தியுள்ளனர்.
தமிழகத்தில் நேரடி நெல் கொள்முதல் நிலையங்களில் விவசாயிகளிடம் முறைகேடாக பணம் வசூலிப்பதாக அவ்வப்போது புகார்கள் எழுந்து வருகின்றன. இதுபோன்ற புகார்களைத் தடுக்க அதிகாரிகள் கண்காணிப்பை தீவிரப்படுத்த வேண்டும் என்ற கோரிக்கையும் எழுந்துள்ளது.