மதுரை தனிஷ்க் நகைக்கடையில் நிகழ்ந்த கொள்ளைச் சம்பவத்தைத் தொடர்ந்து, கரூர் மாவட்டத்திலுள்ள நகைக்கடைகளில் பாதுகாப்பு ஏற்பாடுகளை பலப்படுத்துவது மற்றும் குற்றச் சம்பவங்களைத் தடுப்பது குறித்த ஆலோசனைக் கூட்டம் இன்று நடைபெற்றது.
மதுரையில் அண்மையில் பிரபல நகைக்கடையில் கொள்ளை சம்பவம் நடைபெற்றதை அடுத்து, தமிழகம் முழுவதும் உள்ள நகைக்கடைகளில் பாதுகாப்புப் பலப்படுத்தப்பட்டு வருகிறது. இதன் ஒரு பகுதியாக, கரூர் மாவட்ட நகைக் கடை உரிமையாளர்கள் சங்க நிர்வாகிகளுடன் காவல்துறையினர் இன்று மாலை முக்கிய ஆலோசனைக் கூட்டத்தை நடத்தினர்.
சமூக நீதி மற்றும் மனித உரிமைகள் பாதுகாப்பு பிரிவு துணை காவல் கண்காணிப்பாளர் ராஜேஷ் தலைமையில் நடைபெற்ற இக்கூட்டத்தில், நகைக்கடை உரிமையாளர்களுக்கு பல்வேறு பாதுகாப்பு வழிகாட்டுதல்கள் வழங்கப்பட்டன. அதன்படி, கடைகளில் கூடுதல் கண்காணிப்பு கேமராக்களைப் பொருத்துவதுடன், இருபுறமும் முழுமையாகக் கண்காணிக்கும் வகையில் கேமராக்களின் கோணங்களை அமைக்க வேண்டும் என்று அறிவுறுத்தப்பட்டது.
மேலும், இரவு நேரப் பாதுகாப்புப் பணிகளுக்கு இளம் வயதுடைய காவலாளிகளை நியமிக்க வேண்டும் என்றும், நகை வாங்க வரும் வாடிக்கையாளர்களைத் தீவிரமாகக் கண்காணிக்க அதிநவீன கேமராக்களைப் பயன்படுத்த வேண்டும் என்றும் கேட்டுக் கொள்ளப்பட்டது. சந்தேகத்திற்கிடமான நபர்களின் நடமாட்டம் கண்டறியப்பட்டால், உடனடியாகக் காவல்துறையினருக்குத் தகவல் தெரிவிக்க வேண்டும் என்றும் வலியுறுத்தப்பட்டது.
இந்நிகழ்ச்சியில் கரூர் ஷராப் வர்த்தகர்கள் சங்க நிர்வாகிகள் மற்றும் காவல் ஆய்வாளர்கள் செந்தில்குமார், தாந்தோன்றிமலை ஓம் பிரகாஷ், வெள்ளியணை ஞானசேகரன் உள்ளிட்ட காவல்துறையினர் பலர் கலந்துகொண்டனர். காவல்துறையினரின் இந்த ஆலோசனைகளும் விழிப்புணர்வும் மிகவும் பயனுள்ளதாக இருப்பதாக கரூர் ஷராப் வர்த்தகர்கள் சங்கத்தின் செயலாளர் எம்.பாலசுப்பிரமணி தெரிவித்தார்.









