திருப்பத்தூர் மாவட்டம், ஏலகிரி மலை அடிவாரத்தில் அமைந்துள்ள ஜலகாம்பாறை நீர்வீழ்ச்சியில் பருவமழை காரணமாக தண்ணீர் ஆர்ப்பரித்துக் கொட்டி வருவதால், சுற்றுலாப் பயணிகள் மிகுந்த மகிழ்ச்சி அடைந்துள்ளனர்.
கடந்த சில மாதங்களாகப் போதிய மழையின்றி நீர்வீழ்ச்சி வறண்டு காணப்பட்டதால், அங்கு வந்த சுற்றுலாப் பயணிகள் ஏமாற்றத்துடன் திரும்பிச் சென்றனர். இந்நிலையில், திருப்பத்தூர் மாவட்டத்தில் கடந்த ஒரு வாரத்திற்கும் மேலாகத் தொடர்ந்து பெய்துவரும் கனமழை காரணமாக, ஜலகாம்பாறை நீர்வீழ்ச்சியில் தற்போது தண்ணீர் பெருக்கெடுத்து ஓடுகிறது.
நீண்ட நாட்களுக்குப் பிறகு நீர்வீழ்ச்சிக்கு நீர்வரத்து அதிகரித்துள்ளதால், விடுமுறை நாட்களில் பல்வேறு பகுதிகளில் இருந்தும் ஏராளமான சுற்றுலாப் பயணிகள் வருகை தந்துள்ளனர். அவர்கள் நீர்வீழ்ச்சியின் அழகைக் கண்டு ரசிப்பதோடு, அங்கு உற்சாகமாகக் குளித்து மகிழ்கின்றனர். மேலும், நீர்வீழ்ச்சிக்குப் அருகில் அமைந்துள்ள பிரசித்தி பெற்ற முருகன் மற்றும் சிவன் கோயில்களுக்கும் சென்று பக்தர்கள் சுவாமி தரிசனம் செய்து வருகின்றனர்.
தொடர் மழையின் காரணமாக நீர்வரத்து மேலும் அதிகரிக்க வாய்ப்புள்ளதால், சுற்றுலாப் பயணிகள் உரிய பாதுகாப்புடன் நீர்வீழ்ச்சியில் குளிக்க வேண்டும் என்று அதிகாரப்பூர்வமாக அறிவுறுத்தப்பட்டுள்ளது.