வேலூர் கோட்டைக்குள் அமைந்துள்ள பிரசித்தி பெற்ற ஸ்ரீ ஜலகண்டேஸ்வரர் கோவிலில் ஐப்பசி மாத அன்னாபிஷேகம் விமரிசையாக நடைபெற்றது. இந்நிகழ்ச்சியை முன்னிட்டு, மூலவர் ஜலகண்டேஸ்வரருக்கு சுமார் அரை டன் (500 கிலோ) அரிசியால் தயாரிக்கப்பட்ட சாதத்தைக் கொண்டு சிறப்பு அன்னாபிஷேகம் செய்யப்பட்டது. மேலும், சாத்துக்கொடி, ஆப்பிள் மற்றும் வடை மாலைகள் அணிவிக்கப்பட்டு மகா தீபாராதனை காட்டப்பட்டது.
இதேபோல், கோவிலில் உள்ள ஸ்ரீ அகிலாண்டேஸ்வரி அம்மனுக்கு கத்தரிக்காய், கேரட், வாழைக்காய், முள்ளங்கி, சுரைக்காய், பூசணிக்காய் உள்ளிட்ட பல்வேறு காய்கறிகள் மற்றும் ஆப்பிள், திராட்சை உள்ளிட்ட பழங்கள் அடங்கிய சுமார் 600 கிலோ எடையைக் கொண்டு சாகம்பரி (ஷாகாம்பரி) அலங்காரம் செய்யப்பட்டது.
இந்த சிறப்பு வழிபாட்டில் கலவை சச்சிதானந்த சுவாமிகள், பாலமுருகனடிமை சுவாமிகள் உள்ளிட்ட ஆன்மிகப் பெரியவர்களும், ஆயிரக்கணக்கான பக்தர்களும் கலந்துகொண்டு அரோகரா முழக்கத்துடன் சாமி தரிசனம் செய்தனர். விழாவையொட்டி பிற்பகல் முதலே பக்தர்கள் நீண்ட வரிசையில் காத்திருந்து தரிசனம் மேற்கொண்டனர்.