கொடைக்கானலில் இரண்டு மணி நேரம் கொட்டி தீர்த்த கனமழை!

திண்டுக்கல் மாவட்டம் கொடைக்கானல் நகர் மற்றும் அதன் சுற்றுவட்டாரப் பகுதிகளில் இன்று மாலை இரண்டு மணி நேரத்திற்கும் மேலாக கனமழை பெய்தது.

நாயுடுபுரம், ஏரிசாலை, வில்பட்டி மற்றும் பள்ளங்கி உள்ளிட்ட பல்வேறு பகுதிகளில் இந்த மழை பதிவானது. கடந்த சில வாரங்களாகத் தொடர்ந்து நிலவி வரும் சாரல் மழையின் காரணமாக அப்பகுதியில் குளிர்ந்த காலநிலை நீடித்து வருகிறது.

தற்போது பெய்துள்ள இந்த கனமழையின் மூலம் அப்பகுதிகளில் நிலவி வந்த குடிநீர் தட்டுப்பாடு குறையும் என்பதால், விவசாயிகளும் பொதுமக்களும் மிகுந்த மகிழ்ச்சி அடைந்துள்ளனர்.