திருப்பத்தூர்: திருப்பத்தூர் ஊராட்சி ஒன்றியம், ஏழருவி முதல் ஏ.கே. மோட்டூர் வரை 5 கிலோமீட்டர் நீளமுள்ள நீர்வரத்து கால்வாயை தூர்வாரி சீரமைக்கும் பணி தொடங்கப்பட்டுள்ளது.
விவசாயிகள் மற்றும் பொதுமக்களின் கோரிக்கையை ஏற்று, மாவட்ட நிர்வாகம் மற்றும் எக்ஸ்னோரா அமைப்பு மூலம் வழங்கப்பட்ட வாடகையில்லா பொக்லைன் இயந்திரம் கொண்டு இப்பணி மேற்கொள்ளப்படுகிறது. திருப்பத்தூர் சட்டமன்ற உறுப்பினர் நல்லதம்பி திருப்பதி கொடியசைத்து இத்திருப்பணியைத் தொடங்கி வைத்தார்.
கடந்த 8 மாதங்களில் ஹூண்டாய் மோபிஸ் நிறுவனம் வழங்கிய வாடகையில்லா பொக்லைன் இயந்திரம் மூலம் மாவட்டத்தில் 11 நீர்நிலைகள் சீரமைக்கப்பட்டுள்ளன. இதன் தொடர்ச்சியாக, காயத்ரி சாரிடபிள் டிரஸ்ட் மூலம் எக்ஸ்னோரா அமைப்பிற்கு கூடுதலாக நான்கு பொக்லைன் இயந்திரங்கள் வழங்கப்பட்டுள்ளன.
இதன் மூலம் கடந்த திங்கட்கிழமை மாடப்பள்ளி ஏரியிலும், தற்போது ஏழருவி கால்வாயிலும் சீரமைப்புப் பணிகள் தொடங்கப்பட்டுள்ளன. மேலும், அடுத்த 60 நாட்களுக்கு இந்த நான்கு இயந்திரங்களைக் கொண்டு மாவட்டம் முழுவதும் நீர்வரத்துக் கால்வாய்கள், நீர்ப்பாசனக் கால்வாய்கள் மற்றும் உபரிநீர் கால்வாய்களை சீரமைக்க மாவட்ட ஆட்சியரின் உத்தரவின்பேரில் தீவிர நடவடிக்கை எடுக்கப்பட உள்ளது.
இந்நிகழ்ச்சியில் வேர்கள் அறக்கட்டளை நிறுவனர் வடிவேல் சுப்பிரமணியன், எக்ஸ்னோரா மாவட்ட ஒருங்கிணைப்பாளர் கிரிதரன், ஏ.கே. மோட்டூர் முன்னாள் ஊராட்சி மன்றத் தலைவர் வேலு, தமிழக விவசாயிகள் பாதுகாப்புச் சங்க மாவட்டச் செயலாளர் ராதாகிருஷ்ணன், ஓம்சிவம், சமூக ஆர்வலர் முருகன், முத்தமிழ் வேந்தன், ஊராட்சி செயலாளர் வசந்தி உள்ளிட்டோர் உடன் இருந்தனர்.









