விருதுநகர் மாவட்டம் சிவகாசி அருகே திருத்தங்கல் பகுதியில் உள்ள பெரியகுளம் கண்மாய், 35 ஆண்டுகளுக்குப் பிறகு தூர்வாரும் பணிக்காக மீட்கப்பட்டுள்ளது. உயர்நீதிமன்ற மதுரை கிளை நீதிபதி புகழேந்தி, கொடியசைத்து இந்தப் பணிகளை தொடங்கி வைத்தார்.
திருத்தங்கல் பகுதியில் அமைந்துள்ள பெரியகுளம் கண்மாய், சுமார் 320 ஏக்கர் பரப்பளவுடன், 1,100 ஏக்கர் விவசாய நிலங்களுக்கு பாசன வசதி அளித்து வருகிறது. நீண்டகாலமாக தூர்வாரப்படாததால் கண்மாயில் முழுமையாக நீரை தேக்கி வைக்க முடியாத நிலை ஏற்பட்டது. இதன் காரணமாக அப்பகுதி விவசாயிகளும் பாதிக்கப்பட்டதாக கூறப்படுகிறது.
இந்நிலையில், கண்மாயை சீரமைத்து மீண்டும் விவசாய பயன்பாட்டுக்கு கொண்டு வரும் நோக்கில் தூர்வாரும் பணிகள் தொடங்கப்பட்டுள்ளன. பசுமை மன்றம் என்ற இயற்கை பாதுகாப்பு அமைப்பின் ஏற்பாட்டில், நூற்றுக்கணக்கான தன்னார்வலர்கள் இந்தப் பணியில் ஈடுபட்டுள்ளனர்.
பூமி பூஜையுடன் தொடங்கிய தூர்வாரும் பணி
தூர்வாரும் பணிகள் பூமி பூஜையுடன் தொடங்கின. இதில் சிறப்பு விருந்தினராக பங்கேற்ற உயர்நீதிமன்ற மதுரை கிளை நீதிபதி புகழேந்தி, கொடியசைத்து பணிகளை துவக்கி வைத்தார். இதனைத் தொடர்ந்து பொக்லைன் இயந்திரங்கள் மூலம் கண்மாயில் வளர்ந்துள்ள சீமைக்கருவேல மரங்கள் அகற்றப்பட்டு, தூர்வாரும் பணிகள் தீவிரப்படுத்தப்பட்டுள்ளன.
நிகழ்ச்சியில் பேசிய நீதிபதி புகழேந்தி, இயற்கையை பாதுகாப்பதில் அனைவரும் பொறுப்புடன் செயல்பட வேண்டும் என்று வலியுறுத்தினார். இயற்கையை தொடர்ந்து பாதிப்புக்கு உள்ளாக்கும்போது அதன் விளைவுகள் பெரிய பேரிடர்களாக மாறும் என்றும் அவர் குறிப்பிட்டார்.
நீர்நிலைகளை மாசுபடுத்துதல் அல்லது ஆக்கிரமிப்பு செய்தல் போன்ற சம்பவங்கள் தொடர்பாக பொதுநல மனுக்கள் உயர்நீதிமன்ற மதுரை கிளையில் தாக்கல் செய்யப்பட்டால், உரிய நடவடிக்கைக்காக பரிந்துரை செய்து சட்டரீதியான நடவடிக்கை எடுக்கப்படும் என்றும் தெரிவித்தார்.
100 நாள் வேலை திட்டத்தை பயன்படுத்த வலியுறுத்தல்
நீர்நிலைகளில் வளர்ந்துள்ள சீமைக்கருவேல மரங்களை அகற்றுவதற்கு 100 நாள் வேலை உறுதித் திட்ட பணியாளர்களை பயன்படுத்தினால் நீர்நிலைகளை சிறப்பாக பாதுகாக்க முடியும் என்றும் நீதிபதி புகழேந்தி யோசனை தெரிவித்தார்.
தரமான குடிநீர் இல்லாத நிலை பல்வேறு நோய்களுக்கு காரணமாக அமையக்கூடும் என்பதால், நீர்நிலைகளை பாதுகாப்பதும் குடிநீர் ஆதாரங்களை சுத்தமாக பராமரிப்பதும் அவசியம் என அவர் வலியுறுத்தினார்.
அரசின் முழுமையான பங்களிப்பை மட்டும் எதிர்பார்க்காமல், பொதுமக்கள் மற்றும் தன்னார்வலர்கள் இணைந்து நீர்நிலைகளை மீட்கும் முயற்சிகள் அரசுக்கு முன்மாதிரியாக அமையும் என்றும் அவர் தெரிவித்தார்.
மேலும், விருதுநகர் மாவட்டத்தில் உள்ள 200 கண்மாய்களை ஓராண்டுக்குள் தன்னார்வலர்கள் இணைந்து தூர்வார வேண்டும் என்ற இலக்கை முன்வைத்தார். 200-வது கண்மாய் தூர்வாரும் பணியின்போது மதுரையிலிருந்து 10 நீதிபதிகளை அழைத்து வருவேன் என்றும் நீதிபதி புகழேந்தி தெரிவித்தார்.
35 ஆண்டுகளுக்குப் பிறகு தொடங்கிய பெரியகுளம் கண்மாய் தூர்வாரும் பணிக்கு அப்பகுதி பொதுமக்கள் மற்றும் விவசாயிகள் வரவேற்பு தெரிவித்துள்ளனர்.