கோயம்புத்தூரில் பெண் தொழில்முனைவோர் மற்றும் பழங்குடியின சமூகத்தைச் சேர்ந்த கைவினைஞர்களின் திறமைகளையும் தயாரிப்புகளையும் பொதுமக்களிடம் கொண்டு சேர்க்கும் வகையில், ‘ஆதி சக்தி 2026’ என்ற மாபெரும் கண்காட்சி நடைபெற்று வருகிறது.
இரண்டு நாட்கள் நடைபெறும் இந்தக் கண்காட்சியில் பல்வேறு பகுதிகளைச் சேர்ந்த பெண் தொழில்முனைவோர் மற்றும் பழங்குடியின கைவினைஞர்கள் தங்களது தயாரிப்புகளை காட்சிப்படுத்தி, நேரடியாக விற்பனை செய்வதற்கான வாய்ப்பும் ஏற்படுத்தப்பட்டுள்ளது.
கண்காட்சியில் கைவினைப் பொருட்கள், பாரம்பரிய தயாரிப்புகள், உணவுப் பொருட்கள், இயற்கை சார்ந்த பொருட்கள் உள்ளிட்ட பல்வேறு வகையான தயாரிப்புகள் இடம்பெற்றுள்ளன. இதன் மூலம் பாரம்பரிய கலை மற்றும் கைவினைப் பொருட்களுக்கு புதிய சந்தை வாய்ப்புகளை உருவாக்குவதுடன், சிறு தொழில்களில் ஈடுபட்டு வரும் பெண்களுக்கு புதிய வாடிக்கையாளர்களை அறிமுகப்படுத்தும் நோக்கமும் முன்னெடுக்கப்பட்டுள்ளது.
மேலும், பழங்குடியின கைவினைஞர்களின் பாரம்பரிய திறன்களுக்கும், அவர்களின் உழைப்பால் உருவாக்கப்படும் பொருட்களுக்கும் உரிய அங்கீகாரம் மற்றும் சந்தை வாய்ப்பை ஏற்படுத்தும் வகையில் இந்தக் கண்காட்சி அமைந்துள்ளதாக ஏற்பாட்டாளர்கள் தெரிவித்துள்ளனர்.
பெண்கள் சொந்தமாக தொழில் தொடங்கி பொருளாதார ரீதியாக முன்னேறுவதற்கும், ஏற்கனவே தொழில் செய்து வருபவர்கள் தங்களது தயாரிப்புகளை மேலும் விரிவுபடுத்துவதற்கும் இதுபோன்ற கண்காட்சிகள் முக்கிய பங்கு வகிக்கின்றன.
‘ஆதி சக்தி 2026’ கண்காட்சியில் பொதுமக்கள் பங்கேற்று, பெண் தொழில்முனைவோர் மற்றும் பழங்குடியின கைவினைஞர்களின் தயாரிப்புகளை நேரடியாக வாங்குவதன் மூலம் அவர்களின் வாழ்வாதாரத்துக்கும் தொழில் வளர்ச்சிக்கும் ஆதரவளிக்கலாம் என தெரிவிக்கப்பட்டுள்ளது.
பெண்களின் தொழில்முனைவு, பழங்குடியினரின் பாரம்பரிய கலை மற்றும் உள்ளூர் தயாரிப்புகளை முன்னிறுத்தும் வகையில் நடைபெறும் இந்த இருநாள் கண்காட்சி, கோவையில் நடைபெறும் முக்கிய நிகழ்வுகளில் ஒன்றாக அமைந்துள்ளது.