வேலூர் மாவட்டம் குடியாத்தம் அருகே உள்ள ராமாபுரம் கிராமத்தில், விவசாய நிலத்தில் புகுந்து கோழியை விழுங்கிய 12 அடி நீளமுள்ள மலைப்பாம்பை வனத்துறையினர் ஒரு மணி நேர போராட்டத்திற்குப் பிறகு பத்திரமாகப் பிடித்தனர்.
பரதராமி அடுத்த ராமாபுரம் கிராமத்தைச் சேர்ந்த கங்காதரன் என்பவருக்குச் சொந்தமான விவசாய நிலத்தில், பசு மாடுகளுக்காகத் திணை பயிர் அறுவடை செய்யும் பணி நடைபெற்றது. அப்போது, அங்கு வந்த மலைப்பாம்பு ஒன்று கோழி ஒன்றை முழுமையாக விழுங்கியது. இதனால் நகர முடியாமல் அங்கேயே இருந்த பாம்பைக் கண்டு அதிர்ச்சியடைந்த பணியாளர்கள், உடனடியாக நிலத்தை விட்டு வெளியேறி குடியாத்தம் வனத்துறையினருக்குத் தகவல் தெரிவித்தனர்.
சம்பவ இடத்திற்கு விரைந்து வந்த வனத்துறையினர், பாம்பு கோழியை விழுங்கிய நிலையில் உடனடியாகப் பிடித்தால் அது ஆபத்தை ஏற்படுத்தும் என்பதைக் கருத்தில் கொண்டு காத்திருந்தனர். பாம்பு கோழியை கக்கிவிட்டு சிறிது தூரம் நகர்ந்ததும், வனத்துறையினர் தீவிரமாகப் போராடி அதனை லாவகமாகப் பிடித்தனர்.
சுமார் 12 அடி நீளம் கொண்ட இந்த மலைப்பாம்பு, அருகில் உள்ள அனுப்பு காட்டில் பாதுகாப்பாக விடப்பட்டது. பகல் நேர விவசாய நிலத்தில் மலைப்பாம்பு பிடிபட்ட சம்பவம் அப்பகுதி மக்களிடையே சிறிது நேரம் பரபரப்பை ஏற்படுத்தியது.