திண்டுக்கல் மாவட்டம் கொடைக்கானல் பிரையன்ட் பூங்காவில் தற்போது ஆப் சீசன் எனப்படும் சுற்றுலா அல்லாத பருவத்திற்காக, சால்வியா, பிங்க் ஆஸ்டர், ஒயிட் ஆஸ்டர், டெல்பினியம் மற்றும் லில்லியம் உள்ளிட்ட 10 வகையான மலர் செடிகள் நடவு செய்யப்பட்டுள்ளன.
இங்கு கடந்த சில தினங்களாக பகலில் வெயில் நிலவி வரும் நிலையில், இரவில் பனியின் தாக்கம் அதிகரித்து வருகிறது. குறிப்பாக, பகலில் 20 டிகிரி செல்சியஸ் வெப்பநிலையும், இரவில் 8 டிகிரி செல்சியஸ் வரை குளிரும் பதிவாகி வருகிறது.
இந்த தீவிரமான பனிப்பொழிவின் காரணமாக மலர் செடிகள் கருகும் அபாயம் ஏற்பட்டுள்ளதால், அதனைத் தவிர்க்கும் விதமாக பூங்கா நிர்வாகம் சார்பில் செடிகளுக்கு நிழல்வலை அமைப்பு கொண்ட பனிப்போர்வைகள் போர்த்தப்பட்டு தீவிர பாதுகாப்புப் பணிகள் மேற்கொள்ளப்பட்டு வருகின்றன.









