இளையராஜா இசையில் உருவாகியுள்ள ‘டோரதி’ படத்தின் 40 நிமிட பின்னணி இசை நேரடி நிகழ்ச்சி
இயக்குநர் கார்த்திக் சுப்பராஜின் 10-வது திரைப்படமாக உருவாகியுள்ள ‘டோரதி’ படத்தின் பின்னணி இசை வெளியீடு குறித்த முக்கிய அறிவிப்பு வெளியாகியுள்ளது. இப்படத்தில் கீர்த்தி சுரேஷ் கதாநாயகியாக நடித்துள்ள நிலையில், சனந்த் மற்றும் ரிஷிகாந்த் ஆகியோர் முக்கிய கதாபாத்திரங்களில் நடித்துள்ளனர். மதுரையை மையமாகக் கொண்டு உருவாகியுள்ள இப்படத்திற்கு இசையமைப்பாளர் இளையராஜா இசையமைத்துள்ளார்.
‘டோரதி’ படத்தில் இடம்பெற்றுள்ள ‘கல்யாண விருந்து’, ‘முத்துமணி’ ஆகிய பாடல்கள் ஏற்கெனவே வெளியாகி ரசிகர்களிடம் வரவேற்பைப் பெற்றுள்ளன. மேலும், படத்தின் டீசரும் வெளியாகி படத்தின் மீதான எதிர்பார்ப்பை அதிகரித்துள்ளது.
இந்நிலையில், படத்தின் முழு பின்னணி இசைக்கோர்வையை படத்தின் வெளியீட்டுக்கு முன்பாகவே தனி ஆல்பமாக வெளியிட இருப்பதாக இயக்குநர் கார்த்திக் சுப்பராஜ் தெரிவித்துள்ளார். அதன்படி, ‘டோரதி’ படத்தின் முழு பின்னணி இசை செப்டம்பர் 5-ஆம் தேதி டிஜிட்டல் தளங்களிலும், வினைல் வடிவிலும் வெளியாகிறது.
மேலும், இதையொட்டி 40 நிமிடங்கள் கொண்ட முழுமையான பின்னணி இசை நேரடி நிகழ்ச்சியும் செப்டம்பர் 5-ஆம் தேதி இமேஜ் ஆடிட்டோரியத்தில் நடைபெற உள்ளதாக கார்த்திக் சுப்பராஜ் அறிவித்துள்ளார். இளையராஜாவின் இசையில் உருவான பின்னணி இசை நேரடியாக இசைக்கப்பட இருப்பது ரசிகர்கள் மத்தியில் கூடுதல் எதிர்பார்ப்பை ஏற்படுத்தியுள்ளது.
தான் இயக்கிய படத்திற்கு இளையராஜா இசையமைக்க ஒப்புக்கொண்டது மிகுந்த மகிழ்ச்சியையும் உற்சாகத்தையும் அளித்ததாக கார்த்திக் சுப்பராஜ் தனது பதிவில் குறிப்பிட்டுள்ளார். தற்போது ‘டோரதி’ படத்தின் பின்னணி இசை வெளியீட்டுக்காக ரசிகர்கள் ஆவலுடன் காத்திருக்கின்றனர்.