கோவை பிஎஸ்ஜி மருத்துவ அறிவியல் மற்றும் ஆராய்ச்சி நிறுவனத்தின் 34-வது முதுநிலை மருத்துவப் பட்டமளிப்பு விழா கல்லூரி அரங்கில் நடைபெற்றது. இதில் 83 முதுநிலை மருத்துவ மாணவர்களுக்கு பட்டச் சான்றிதழ்கள் வழங்கப்பட்டன.
விழாவில் மதுரை அரவிந்த் கண் மருத்துவமனையின் தலைமை மருத்துவ அதிகாரியும், விழித்திரை மற்றும் விட்ரியஸ் சிகிச்சைப் பிரிவின் மூத்த மருத்துவ ஆலோசகரும், தகவல் தொழில்நுட்பம் மற்றும் அமைப்புகள் பிரிவின் இயக்குநருமான டாக்டர் ஆர். கிம் சிறப்பு விருந்தினராகக் கலந்து கொண்டு சிறப்புரையாற்றினார். பிஎஸ்ஜி மருத்துவ அறிவியல் மற்றும் ஆராய்ச்சி நிறுவனத்தின் முதல்வர் டாக்டர் டி. எம். சுப்பாராவ் வரவேற்புரை நிகழ்த்தினார்.
தொடர்ந்து நடைபெற்ற நிகழ்ச்சியில், மொத்தம் 83 முதுநிலை மருத்துவ மாணவர்களுக்குப் பட்டங்கள் வழங்கப்பட்டன. மேலும், கல்வி மற்றும் மருத்துவத் துறையில் சிறப்பாகச் செயல்பட்ட மாணவர்களுக்குத் தங்கப் பதக்கங்களும், மருத்துவத் தணிக்கையில் சிறந்து விளங்கியவர்களுக்குச் சான்றிதழ்களும் வழங்கப்பட்டன.
மருத்துவத் துறையில் தங்களது தொழில்முறைப் பயணத்தைத் தொடங்கும் முதுநிலை பட்டதாரிகளுக்கு இந்த விழா ஒரு முக்கிய மைல்கல்லாக அமைந்தது. நிகழ்ச்சியின் நிறைவாக, பிஎஸ்ஜி மருத்துவ அறிவியல் மற்றும் ஆராய்ச்சி நிறுவனத்தின் மருத்துவக் கண்காணிப்பாளரும், நோயியல் துறை பேராசிரியருமான டாக்டர் பிரசன்னா என். குமார் நன்றியுரை வழங்க, தேசிய கீதத்துடன் விழா நிறைவுபெற்றது.