மத்திய அரசின் கல்வி உதவித்தொகை: அரியலூர் மாவட்ட ஆட்சியர் முக்கிய அறிவிப்பு!

மத்திய அரசால் இதர பிற்படுத்தப்பட்டோர் (OBC), பொருளாதாரத்தில் பின்தங்கியவர்கள் (EBC) மற்றும் சீர்மரபினர் (DNT) மாணவ, மாணவியர்களுக்கு கல்வி உதவித்தொகை வழங்கும் வகையில் பிரதம மந்திரியின் கல்வி உதவித்தொகை திட்டம் (PM YASASVI) செயல்படுத்தப்பட்டு வருகிறது.

2026-27 ஆம் ஆண்டிற்கு தேசிய கல்வி உதவித்தொகை இணையதளத்தில் அறிவிக்கப்பட்டுள்ள சிறந்த செயல்பாடு கல்வி நிறுவனங்களில் (100% தேர்ச்சி பெற்றுள்ள பள்ளிகள்) நடப்பாண்டில் 9 ஆம் வகுப்பு முதல் 12 ஆம் வகுப்பு வரை பயிலும் தமிழகத்தைச் சார்ந்த தகுதியான மாணவ, மாணவியர்கள் கல்வி உதவித்தொகை திட்டத்திற்கு விண்ணப்பிக்கலாம் என்று அரியலூர் மாவட்ட ஆட்சியர் ந.மிருணாளினி தெரிவித்துள்ளார்.

இத்திட்டத்தின் சிறப்பம்சங்கள் மற்றும் நிபந்தனைகள்:

• உதவித்தொகை விவரம்: கல்விக் கட்டணம் மற்றும் விடுதிக் கட்டணமாக ஆண்டொன்றுக்கு அதிகபட்சமாக 9 மற்றும் 10 ஆம் வகுப்பு பயில்பவர்களுக்கு ரூ.75,000 வரையிலும், 11 மற்றும் 12 ஆம் வகுப்பு பயில்பவர்களுக்கு ரூ.1,25,000 வரையிலும் ஒன்றிய அரசால் வழங்கப்படும்.
• பெண்களுக்கான ஒதுக்கீடு: இத்திட்டத்தில் 30 சதவீதம் மாணவிகளுக்கு ஒதுக்கீடு செய்யப்பட்டுள்ளது.
• பிரிவுகள்: மாணவ, மாணவியர் இதர பிற்படுத்தப்பட்ட வகுப்பினர் (OBC), பொருளாதாரத்தில் பின்தங்கிய வகுப்பினர் (EBC) அல்லது சீர்மரபினர் (DNT) பிரிவைச் சேர்ந்தவராக இருத்தல் வேண்டும்.
• வருமான வரம்பு: குடும்பத்தின் மொத்த ஆண்டு வருமானம் ரூ.2.50 லட்சத்திற்கு மிகாமல் இருக்க வேண்டும்.
• பள்ளித் தகுதி: 2025-26 ஆம் கல்வியாண்டில் 100% தேர்ச்சி பெற்று தேசிய கல்வி உதவித்தொகை இணையதளத்தில் மத்திய அரசால் வெளியிடப்பட்டுள்ள பட்டியலில் இடம் பெற்றுள்ள பள்ளிகளில் பயில்பவராக இருத்தல் வேண்டும்.

புதுப்பித்தல் (Renewal): கடந்த நிதியாண்டில் (2025-26) கல்வி உதவித்தொகை பெற்று பயனடைந்த மாணவ, மாணவியர்கள் நடப்பாண்டில் (2026-27) 10 மற்றும் 12 ஆம் வகுப்பு விண்ணப்பத்தினை தேசிய கல்வி உதவித்தொகை இணையதளத்தில் (https://scholarships.gov.in) உறுதி செய்து, புதுப்பித்தல் கல்வி உதவித்தொகை படிவத்தை பூர்த்தி செய்து 31.10.2026க்குள் விண்ணப்பிக்க வேண்டும். இணையத்தில் பூர்த்தி செய்யப்பட்டுள்ள விண்ணப்பங்களை பள்ளி தலைமை ஆசிரியர் சரிபார்க்க கடைசி நாள் 15.11.2026 ஆகும்.

புதிய விண்ணப்பங்கள்: 2026-27 ஆம் கல்வியாண்டில் புதியதாக விண்ணப்பிக்க விரும்பும் 9 மற்றும் 11 ஆம் வகுப்பு மாணவர்களுக்கான தேதி தேசிய கல்வி உதவித்தொகை இணையதளத்தில் பின்னர் அறிவிக்கப்படும்.

இது தொடர்பான கூடுதல் விவரங்களை https://scholarships.gov.in மற்றும் https://socialjustice.gov.in ஆகிய இணையதளங்கள் மூலம் அறிந்து கொள்ளலாம் என மாவட்ட நிர்வாகம் தரப்பில் தெரிவிக்கப்பட்டுள்ளது.