திண்டுக்கல்: மாவட்ட ஆட்சியர் அலுவலகம் முன்பு சிஐடியு (CITU) ஆட்டோ தொழிலாளர் சங்கம் சார்பில், மானிய விலையில் தினமும் 5 லிட்டர் எரிபொருள் வழங்குவது உள்ளிட்ட பல்வேறு கோரிக்கைகளை வலியுறுத்தி ஆர்ப்பாட்டம் நடைபெற்றது.
இந்த ஆர்ப்பாட்டத்தில், ஆட்டோ தொழிலாளர்களுக்கு சீருடை வழங்குவது, தீபாவளி போனஸாக ரூ.5,000 வழங்குவது உள்ளிட்ட 10 அம்ச கோரிக்கைகள் வலியுறுத்தப்பட்டன. மேலும், பிற மாநிலங்களைப் போல தமிழக ஆட்டோ தொழிலாளர்களுக்கும் சிறப்புச் சலுகைகள் வழங்கப்பட வேண்டும் என்றும் கோரிக்கை விடுக்கப்பட்டது.
ஆர்ப்பாட்டத்தில் ஏராளமான ஆட்டோ தொழிலாளர்கள் திரளாகப் பங்கேற்று முழக்கங்களை எழுப்பினர். அதனைத் தொடர்ந்து, தங்கள் கோரிக்கைகள் அடங்கிய மனுவை மாவட்ட நிர்வாகத்திடம் சங்க நிர்வாகிகள் வழங்கினர்.