தேனி மாவட்டம் கம்பம் பகுதியில் இருந்து தேனி நோக்கி அரசுப் பேருந்து சென்று கொண்டிருந்தது. வீரபாண்டி அருகே புறவழிச்சாலையில் சென்றுகொண்டிருந்தபோது, எதிர்திசையில் வந்த டிராக்டருடன் அரசுப் பேருந்து நேருக்கு நேர் மோதியதாகக் கூறப்படுகிறது. அப்போது, டிராக்டருக்குப் பின்னால் திருச்சியில் இருந்து குச்சனூர் கோவிலுக்குச் சென்றுகொண்டிருந்த கார், டிராக்டர் மீது மோதியது. இந்த விபத்தில் வாகனங்கள் சேதமடைந்தன.
பெண் சம்பவ இடத்திலேயே பலி
இந்த விபத்தில் காரில் பயணம் செய்த தமயந்தி என்ற பெண் சம்பவ இடத்திலேயே உயிரிழந்தார். டிராக்டரை ஓட்டிச் சென்ற ஓட்டுநர் பலத்த காயமடைந்து கவலைக்கிடமான நிலையில் மீட்கப்பட்டார். பின்னர் அவர் சிகிச்சைக்காக தேனி அரசு மருத்துவக் கல்லூரி மருத்துவமனைக்குக் கொண்டு செல்லப்பட்டார்.
போலீசார் விசாரணை
இந்த விபத்து குறித்து வீரபாண்டி காவல்துறையினர் வழக்குப் பதிவு செய்து விசாரணை நடத்தி வருகின்றனர். அரசுப் பேருந்து ஓட்டுநரின் கவனக்குறைவு விபத்துக்குக் காரணமாக இருக்கலாம் என்ற கோணத்தில் முதற்கட்ட விசாரணை நடைபெற்று வருவதாகத் தெரிவிக்கப்பட்டுள்ளது. விசாரணை முடிவிலேயே விபத்துக்கான முழுமையான காரணம் தெரியவரும்.