இந்திய இருசக்கர வாகன சந்தையில் தனது பங்கினை மேலும் வலுப்படுத்தும் நோக்கில், ஹோண்டா மோட்டார்சைக்கிள் & ஸ்கூட்டர் இந்தியா (HMSI) ஒரே நேரத்தில் 10 புதிய இருசக்கர வாகனங்களை அறிமுகப்படுத்தியுள்ளது. இந்த நடவடிக்கை, இந்தியாவை உலகளாவிய உற்பத்தி மற்றும் விற்பனை மையமாக மாற்றும் ஹோண்டாவின் நீண்டகால திட்டத்தின் ஒரு பகுதியாக பார்க்கப்படுகிறது.
இந்த புதிய வரிசையில் 7 முற்றிலும் புதிய மாடல்களும், 3 மேம்படுத்தப்பட்ட CB350 மாடல்களும் இடம்பெற்றுள்ளன. ஸ்கூட்டர்கள், அட்வென்ச்சர் பைக்குகள், க்ரூசர் மாடல்கள், எலக்ட்ரிக் ஸ்கூட்டர்கள் மற்றும் ஃப்ளெக்ஸ்-ஃப்யூயல் தொழில்நுட்பம் கொண்ட வாகனங்கள் என பல்வேறு பிரிவுகளை ஹோண்டா இலக்காகக் கொண்டுள்ளது.
புதிய வரிசையில் இடம்பெற்றுள்ள முக்கிய மாடல்கள்:
- Honda ADV160 – அட்வென்ச்சர் ஸ்கூட்டர்
- Honda CB500 – நடுத்தர திறன் கொண்ட ரோட்ஸ்டர்
- Honda Rebel 300
- Honda Rebel 500 (புதுப்பிப்பு)
- Honda XR300L
- Honda XR300 Rally
- Honda QC3 Electric Scooter
- புதிய நிறங்களில் CB350, CB350 H'ness மற்றும் CB350RS மாடல்கள்.
இந்த வாகனங்கள் அனைத்தும் ஒரே நேரத்தில் விற்பனைக்கு வராது. சந்தைத் தேவைக்கு ஏற்ப கட்டங்களாக இந்தியாவில் அறிமுகப்படுத்தப்படும் என்றும், ஒவ்வொரு மாடலின் விலை மற்றும் வெளியீட்டு தேதி பின்னர் அறிவிக்கப்படும் என்றும் நிறுவனம் தெரிவித்துள்ளது.
ஹோண்டா, பெட்ரோல் வாகனங்களுடன் மட்டுமல்லாமல் எலக்ட்ரிக் வாகனங்கள் (EV) மற்றும் Flex-Fuel தொழில்நுட்பத்திலும் கவனம் செலுத்தி வருகிறது. சுற்றுச்சூழலுக்கு உகந்த போக்குவரத்து தீர்வுகளை வழங்குவதோடு, இந்தியாவில் பிரீமியம் இருசக்கர வாகன சந்தையில் தனது இருப்பை அதிகரிப்பதே இந்த புதிய திட்டத்தின் நோக்கமாகும்.
மேலும், இந்தியாவில் உற்பத்தித் திறனை உயர்த்துவதற்காக ஹோண்டா தனது தொழிற்சாலைகளில் முதலீடுகளை அதிகரித்து வருகிறது. உள்நாட்டு சந்தை மட்டுமின்றி ஏற்றுமதியையும் விரிவுபடுத்தும் வகையில் இந்தியாவை முக்கிய உற்பத்தி மையமாக மாற்றும் முயற்சியில் நிறுவனம் தீவிரமாக செயல்பட்டு வருகிறது.