ஹைபிரிட், டீசல் என 2 இன்ஜின் தேர்வுகள்; 6 மற்றும் 7 இருக்கை வசதி
கியா நிறுவனத்தின் புதிய பிரீமியம் மூன்று வரிசை SUV மாடலான சொரென்டோ, இந்திய சந்தையில் அதிகாரப்பூர்வமாக அறிமுகம் செய்யப்பட்டுள்ளது. ரூ.27.99 லட்சம் ஆரம்ப எக்ஸ்-ஷோரூம் விலையில் வந்துள்ள இந்த கார், ரூ.40.39 லட்சம் வரையிலான விலைப் பிரிவில் கிடைக்கிறது.
இந்தியாவில் கியா நிறுவனத்தின் முதல் ஹைபிரிட் கார் மாடலாக சொரென்டோ அறிமுகமாகியுள்ளது. இது 1.6 லிட்டர் டர்போ பெட்ரோல் ஸ்ட்ராங் ஹைபிரிட் மற்றும் 2.2 லிட்டர் டீசல் இன்ஜின் என இரண்டு பவர்டிரெய்ன் தேர்வுகளுடன் வழங்கப்படுகிறது.
புதிய சொரென்டோவில் 6 பேர் அமரும் கேப்டன் சீட் அமைப்பும், 7 பேர் அமரும் மூன்று வரிசை இருக்கை அமைப்பும் வழங்கப்பட்டுள்ளது. ஹைபிரிட் மாடலில் பெட்ரோல் இன்ஜின் மற்றும் மின்சார மோட்டார் இணைந்து இயங்கும் நிலையில், டீசல் மாடலிலும் அதிக சக்தி கொண்ட இன்ஜின் இடம்பெற்றுள்ளது. தேர்ந்தெடுக்கப்பட்ட வேரியண்ட்களில் AWD வசதியும் கிடைக்கிறது.
காரின் வசதிகளில் இரட்டை 12.3 அங்குல டிஸ்ப்ளே, பனரோமிக் சன்ரூஃப், வயர்லெஸ் சார்ஜிங், 12 ஸ்பீக்கர் Bose சவுண்ட் சிஸ்டம், வென்டிலேட்டட் சீட்கள் மற்றும் 360 டிகிரி கேமரா உள்ளிட்ட அம்சங்கள் இடம்பெற்றுள்ளன. மேலும், இந்தியாவில் முதல் முறையாக ஜெனரேட்டிவ் AI வசதியையும் கியா அறிமுகப்படுத்தியுள்ளது.
பாதுகாப்பிற்காக 10 ஏர்பேக்குகள், லெவல் 2+ ADAS, டிஜிட்டல் ரியர் வியூ மிரர் மற்றும் பார்க்கிங் உதவி தொழில்நுட்பங்கள் வழங்கப்பட்டுள்ளன.
புதிய கியா சொரென்டோவின் முன்பதிவு ஏற்கனவே தொடங்கியுள்ள நிலையில், ரூ.25,000 முன்பணத்துடன் புக்கிங் செய்யலாம் என தெரிவிக்கப்பட்டுள்ளது. வாடிக்கையாளர்களுக்கு வரும் அக்டோபர் மாதம் முதல் டெலிவரி வழங்கப்பட உள்ளது.