புதுடெல்லி: இந்திய ரயில்வே, நாட்டின் முதல் ஹைட்ரஜன் எரிபொருள் தொழில்நுட்பத்தைப் பயன்படுத்தும் பயணிகள் ரயில் சேவையை அறிமுகப்படுத்தி, சுற்றுச்சூழலுக்கு உகந்த போக்குவரத்தை நோக்கிய முக்கிய முன்னேற்றத்தை பதிவு செய்துள்ளது. இந்த ரயில் ஹரியானா மாநிலத்தின் ஜிந்த்–சோனிபட் வழித்தடத்தில் இயக்கப்படுகிறது.
ஹைட்ரஜன் எரிபொருள் செல்கள் மூலம் மின்சாரம் உற்பத்தி செய்து இயங்கும் இந்த ரயில், டீசலுக்கு மாற்றாக தூய்மையான எரிசக்தியை பயன்படுத்துகிறது. இதன் இயக்கத்தின் போது கார்பன் புகை வெளியேறாது; நீராவி மட்டுமே வெளியேறும் என்பதால் சுற்றுச்சூழல் மாசுபாட்டை கணிசமாகக் குறைக்கும் தொழில்நுட்பமாக இது கருதப்படுகிறது.
இந்த புதிய ரயில் சேவை, பசுமை ஆற்றல் பயன்பாட்டை அதிகரிப்பதுடன், இந்தியாவின் தேசிய பசுமை ஹைட்ரஜன் திட்டத்திற்கும் வலுசேர்க்கும் முயற்சியாக பார்க்கப்படுகிறது. மேலும், டீசல் பயன்பாட்டைக் குறைத்து நீண்டகால எரிபொருள் செலவைக் கட்டுப்படுத்தவும் இந்த தொழில்நுட்பம் உதவும் என ரயில்வே வட்டாரங்கள் தெரிவிக்கின்றன.
ஹைட்ரஜன் சேமிப்பு, நிரப்பும் வசதிகள் மற்றும் பாதுகாப்பு கட்டமைப்புகள் உள்ளிட்ட தேவையான உள்கட்டமைப்புகளும் இந்த திட்டத்துடன் உருவாக்கப்பட்டுள்ளன. சோதனை மற்றும் ஆரம்பகட்ட இயக்கத்தின் செயல்திறனை மதிப்பீடு செய்த பின்னர், எதிர்காலத்தில் மேலும் பல வழித்தடங்களில் ஹைட்ரஜன் ரயில்களை இயக்க இந்திய ரயில்வே திட்டமிட்டுள்ளது.