2026 காமன்வெல்த் விளையாட்டுப் போட்டியில் ஆடவர் 65 கிலோ எடைப்பிரிவு பளுதூக்குதலில் வெள்ளிப் பதக்கம் வென்று இந்தியாவுக்கு பெருமை சேர்த்துள்ளார் தமிழகத்தைச் சேர்ந்த ராஜா முத்துப்பாண்டி. இந்த வெற்றிக்குப் பின்னால் கடுமையான உடல்நலப் பிரச்சினைகள், காயங்கள் மற்றும் நீண்ட போராட்டம் நிறைந்த பயணம் இருப்பது பலரையும் நெகிழச் செய்துள்ளது.
தூத்துக்குடி மாவட்டம் கோவில்பட்டியைச் சேர்ந்த ராஜா, சிறுவயதிலிருந்தே பளுதூக்குதல் விளையாட்டில் ஆர்வம் கொண்டு தேசிய மற்றும் சர்வதேச அளவில் பல சாதனைகளைப் படைத்தார். 2019-ஆம் ஆண்டு போட்டியின்போது ஏற்பட்ட முழங்கை தசைநார் கிழிவு காரணமாக அறுவை சிகிச்சை மேற்கொள்ள வேண்டிய நிலை ஏற்பட்டது. அதன் பின்னர் கொரோனா கால கட்டுப்பாடுகளும் அவரது மீள்வரவை தாமதப்படுத்தின.
அதன்பிறகும் சோதனைகள் முடிவடையவில்லை. 2022-ல் அவருக்கு கடுமையான மஞ்சள் காமாலை பாதிப்பு ஏற்பட்டது. அதிலிருந்து மீண்டு வருவதற்குள் குடல்வாலழற்சி (Appendicitis) காரணமாக மீண்டும் அறுவை சிகிச்சை செய்யப்பட்டது. இதனால் சுமார் 10 மாதங்கள் பயிற்சி மேற்கொள்ள முடியாமல் விளையாட்டிலிருந்து விலகும் எண்ணம் கூட ஏற்பட்டதாக கூறப்படுகிறது.
ஆனால் மனம் தளராமல் மீண்டும் கடுமையாக பயிற்சி மேற்கொண்ட ராஜா, தேசிய அளவில் புதிய சாதனைகளைப் படைத்து காமன்வெல்த் போட்டிக்குத் தகுதி பெற்றார். கிளாஸ்கோவில் நடைபெற்ற 2026 காமன்வெல்த் போட்டியில் வெள்ளிப் பதக்கம் வென்று தனது நீண்டகால போராட்டத்திற்கு மகுடம் சூட்டியுள்ளார். தற்போது அவரது இலக்கு ஆசிய விளையாட்டுப் போட்டி மற்றும் 2028 லாஸ் ஏஞ்சல்ஸ் ஒலிம்பிக்கில் இந்தியாவுக்காக பதக்கம் வெல்வதே என தெரிவிக்கப்பட்டுள்ளது.