சென்னை: தமிழ்நாட்டின் அனைத்து மாவட்டங்களிலும் மருத்துவக் கழிவுகளை பாதுகாப்பாக கையாளும் வகையில் தனித்துவமான சுத்திகரிப்பு மற்றும் அகற்றும் மையங்களை அரசு அமைக்க வேண்டும் என்று அமமுக பொதுச்செயலாளர் டிடிவி தினகரன் வலியுறுத்தியுள்ளார்.
இதுகுறித்து அவர் வெளியிட்டுள்ள அறிக்கையில், மருத்துவமனைகள் மற்றும் சுகாதார நிலையங்களில் உருவாகும் உயிரியல் மற்றும் மருத்துவக் கழிவுகள் முறையாக சேகரிக்கப்பட்டு, அறிவியல் முறையில் சுத்திகரிக்கப்பட்டு அகற்றப்படுவது பொதுச் சுகாதாரத்திற்கும் சுற்றுச்சூழல் பாதுகாப்பிற்கும் மிகவும் அவசியம் என தெரிவித்துள்ளார்.
மருத்துவக் கழிவுகளை முறையற்ற வகையில் கையாளுவது தொற்று நோய்கள் பரவுவதற்கும், நிலம் மற்றும் நீர் மாசுபடுவதற்கும் வழிவகுக்கும் என்பதால், மாவட்ட அளவிலான நவீன சுத்திகரிப்பு வசதிகளை உருவாக்க அரசு முன்னுரிமை அளிக்க வேண்டும் என்றும் அவர் வலியுறுத்தியுள்ளார்.
மேலும், மருத்துவக் கழிவு மேலாண்மை தொடர்பான கண்காணிப்பை தீவிரப்படுத்தி, விதிமுறைகளை மீறும் நிறுவனங்கள் மீது கடுமையான நடவடிக்கை எடுக்க வேண்டும் என்றும் அவர் அரசிடம் கோரிக்கை விடுத்துள்ளார்.