"துரோகங்களை கடந்து அதிமுக மீண்டும் வெல்லும்" - விருதுநகர் கூட்டத்தில் கே.டி.ராஜேந்திர பாலாஜி ஆவேசப் பேச்சு!

விருதுநகர்: அதிமுக என்பது பல்வேறு துரோகங்களைக் கடந்து வந்த ஒரு வரலாற்றுச் சிறப்புமிக்க பேரியக்கம் என்றும், எடப்பாடி கே. பழனிசாமி தலைமையில் கட்சி மீண்டும் தமிழகத்தில் நல்லாட்சியை அமைக்கும் என்றும் முன்னாள் அமைச்சர் கே.டி.ராஜேந்திர பாலாஜி தெரிவித்துள்ளார்.

விருதுநகரில் நடைபெற்ற அதிமுக கட்சி நிர்வாகிகளின் ஆலோசனைக் கூட்டத்தில், கழக அமைப்புச் செயலாளரும், முன்னாள் அமைச்சருமான கே.டி.ராஜேந்திர பாலாஜி கலந்துகொண்டு சிறப்புரையாற்றினார். அப்போது அவர் பேசியதாவது:

"அதிமுகவின் வரலாறு என்பது துரோகங்களை வென்ற வரலாறு ஆகும். அன்றைய காலகட்டத்தில் கட்சியின் நிறுவனர் எம்.ஜி.ஆருடன் மதிய உணவு அருந்திவிட்டு, மறுநாளே கலைஞர் கருணாநிதியுடன் கைகோர்த்துப் பேட்டி அளித்த துரோக வரலாற்றை எம்.ஜி.ஆர் எதிர்கொண்டார். எனினும், அத்தனையையும் கடந்து மக்களின் பேராதரவோடு மீண்டும் ஆட்சிக் கட்டிலில் அமர்ந்தார்.

அதிமுக தொடங்கப்பட்டு 53 ஆண்டுகள் கடந்த நிலையிலும், இன்றும் இளைஞர் பட்டாளம் நிறைந்த பேரியக்கமாகவே திகழ்கிறது. எம்.ஜி.ஆரை நேரில் பார்த்திராத இன்றைய தலைமுறை இளைஞர்கள் கூட இன்னமும் அவரது புகழைப் பாடி வருகின்றனர். அந்த அளவுக்கு எம்.ஜி.ஆர் என்ற ஆளுமை தமிழ்நாட்டு மக்களின் மனதில் நீக்கமற நிறைந்துள்ளார். அதேபோல், மறைந்த முன்னாள் முதல்வர் ஜெயலலிதா அவர்களுக்குச் சோதனை வந்தபோதெல்லாம் கட்சியை விட்டு வெளியேறியவர்கள், பின்னர் தங்களின் தவறை உணர்ந்து மன்னிப்புக் கேட்டு மீண்டும் கட்சியில் இணைந்த வரலாறும் நமக்கு உண்டு."

எடப்பாடியாரின் ராஜதந்திரம்:

"அத்தகைய சோதனையான காலகட்டத்தைத்தான் தற்போதைய பொதுச்செயலாளர் எடப்பாடி கே. பழனிசாமியும் எதிர்கொண்டு வருகிறார். அவர் முதலமைச்சராகப் பொறுப்பேற்ற போது, 'ஒரு வாரத்தில் இந்த ஆட்சி கவிழ்ந்துவிடும்' என்று திமுக கூறியது. ஆனால், தனது அசாத்திய ராஜதந்திரத்தால் நான்கு ஆண்டு காலம் மிகச்சிறப்பான ஆட்சியை அவர் நடத்திக் காட்டினார். அன்று அவரது புகழைப் பேசியவர்கள், இன்று தற்காலிக வெற்றி தள்ளிப்போனவுடன் கட்சியை விட்டு ஓடுகிறார்கள். பதவி சுகத்தை அனுபவிப்பதற்காக ஓடும் இவர்களைப் பற்றி நாம் கவலைப்படத் தேவையில்லை."

மாற்று அரசியல் குறித்த விமர்சனம்:

"தமிழ்நாட்டு அரசியலில் ஒரு குறிப்பிட்ட சதவீத வாக்குகள் எப்போதுமே மாற்று சக்திகளுக்குச் செல்வது வழக்கம். அது முன்பு விஜயகாந்த், வைகோ, சீமான் போன்றவர்கள் அரசியலுக்கு வந்தபோதும் நிகழ்ந்தது. இந்த முறை நடிகர் விஜய் கட்சி தொடங்கியதால், அவர் ஒரு பிரபலம் என்ற காரணத்திற்காகக் கூடுதலாகச் சில வாக்குகள் அவருக்குச் சென்றுள்ளன. இதனால் சில இடங்களில் அவர்களுக்குக் கிடைத்திருக்கும் தற்காலிக வெற்றியை, தமிழகத்தில் வீசும் மாற்று அலை என்று கூறுவது முற்றிலும் தவறானது. அப்படியொரு அலை இருந்திருந்தால், 1977-ல் எம்.ஜி.ஆர் பெற்றதைப்போல மிகப்பெரிய பெரும்பான்மை வெற்றியை அவர்கள் பெற்றிருக்க வேண்டும். ஆனால், யதார்த்த நிலை அவ்வாறு இல்லை."

அரசின் மீதான குற்றச்சாட்டுகள்:

"தமிழகத்தில் விஜய் அவர்களின் தவெக ஆட்சிக்கு வந்து 60 நாட்கள் கூட நிறைவடையாத நிலையில், அதற்குள் மக்கள் பல்வேறு பிரச்சினைகளைச் சந்தித்து வருகின்றனர். தேர்தல் நேரத்தில் அவர்கள் கொடுத்த வாக்குறுதிகள் என்னவாயின? மாதந்தோறும் தருவதாகக் கூறிய ₹2500 உதவித்தொகை எங்கே? 6 இலவச சிலிண்டர் திட்டம் என்னாச்சு? வீடு இல்லாதவர்களுக்கு வீடு வழங்கும் திட்டம் எங்கே போனது? மக்களை ஏமாற்றி, பொய் வாக்குறுதிகளைக் கொடுத்து ஆட்சியைப் பிடித்த விஜய் மற்றும் அவரது தவெக கட்சியின் ஆட்சி நீண்ட காலம் நிலைக்காது."

அதிமுகவின் மக்கள் நலத்திட்டங்கள்:

"மத்திய அரசுடன் இணக்கமான உறவைப் பேணி, டெல்லியிடமிருந்து கோடிக்கணக்கான நிதி ஆதாரங்களைப் பெற்றுத் தமிழ்நாட்டு மக்களுக்குப் பல்வேறு நலத்திட்டங்களை வழங்கிய பெருமை அதிமுகவையே சாரும். ஜெயலலிதா மற்றும் எடப்பாடி பழனிசாமி ஆகியோரின் ஆட்சிக் காலத்தில் விலையில்லா மிக்சி, கிரைண்டர், லேப்டாப், தாலிக்குத் தங்கம், திருமண உதவித்தொகை மற்றும் கர்ப்பிணிப் பெண்களுக்கான நிதியுதவி என அத்தனையும் மக்களுக்கு நேரடியாகக் கொண்டு சேர்க்கப்பட்டன. ஆனால், தற்போதைய அரசோ, அடுத்த மாதம் அரசு ஊழியர்களுக்குச் சம்பளம் வழங்குவதற்குக் கூட நிதியின்றித் தவிப்பதாகக் கூறப்படுகிறது."

கட்சியிலிருந்து விலகுவோர் மீது சாடல்:

"சுயநலத்திற்காகக் கட்சியை விட்டு ஓடுபவர்களைப் பற்றி அடிமட்டத் தொண்டர்கள் யாரும் கவலைப்பட வேண்டாம். கொள்ளையடித்த ஒரு கும்பல்தான் இப்போது ஓடிக்கொண்டிருக்கிறது. சொந்த வீட்டிலேயே பேரன், பேத்தி, மனைவி என யாரும் பேச்சைக் கேட்காதவர்கள், கட்சியை விட்டுப் போனால் அதிமுகவிற்கு எந்த இழப்பும் இல்லை. கர்ப்பிணிப் பெண் வீட்டில் 10 லட்சம் ரூபாயைத் திருடியவர்கள் இருந்தால் என்ன, போனால் என்ன? அதிமுகவில் உள்ள ஒரு கோடி தொண்டர்களில் ஒரு சாதாரணத் தொண்டனோ, வார்டு செயலாளரோ, ஒன்றிய செயலாளரோ கட்சியை விட்டுப் போகவில்லை. அர்ப்பணிப்புமிக்க தலைவர்கள் இன்றும் இங்கேயேதான் இருக்கிறார்கள். சுயநலத்திற்காகப் போனவர்கள் எல்லாம் சில மாதங்களில் அங்கு அவமானப்பட்டு, மீண்டும் எடப்பாடியார் பக்கத்தில்தான் வந்து நிற்பார்கள்."

உள்ளாட்சித் தேர்தல் வியூகம்:

"வருகின்ற உள்ளாட்சித் தேர்தலில் பொதுமக்கள் தவெகவிற்கோ அல்லது திமுகவிற்கோ வாக்களிக்கப் போவதில்லை. கிராமங்களில் செல்வாக்கு மிக்க பெரியவர்கள் மற்றும் நல்லவர்கள் அத்தனை பேரும் அதிமுகவில்தான் உள்ளனர். உள்ளாட்சித் தேர்தலில் யாரை வேட்பாளராக நிறுத்த வேண்டும் என்பதை நகர, ஒன்றிய, வார்டு செயலாளர்களாகிய நீங்கள்தான் முடிவு செய்ய வேண்டும். நீங்கள் பரிந்துரைக்கும் பட்டியலின் அடிப்படையிலேயே வேட்பாளர்கள் அறிவிக்கப்படுவார்கள். அதற்கான பணிகளைத் தொண்டர்கள் இப்போதே தொடங்க வேண்டும்."

அமைச்சர்கள் மீது சாடல்:

"தமிழகத்தில் திமுக மற்றும் அதிமுக ஆகிய இரு கட்சிகள் மட்டுமே பலமான கட்டமைப்பைக் கொண்ட பேரியக்கங்கள். அதிலும் கோடிக்கணக்கான தொண்டர்களைக் கொண்ட ஒரே கட்சி அதிமுக மட்டும்தான். தற்போதைய அமைச்சரவையில் உள்ள அமைச்சர்களான கீர்த்தனாவைப் பார்க்க மக்கள் சென்றால், அவர் அலட்சியமாகத் திருப்பி அனுப்புகிறார். அதேபோல், அமைச்சர் ஜெகதீஸ்வரியிடம் மக்கள் தங்களின் குறைகளைக் கூறச் சென்றால், 'தோசை சுட்டு முடித்துவிட்டு வந்து பார்க்கிறேன்' எனக் கூறுகிறார். இதுதான் தற்போதைய அமைச்சர்களின் நிலைமை. எடப்பாடியார் தலைமையில் அதிமுக மீண்டும் தமிழகத்தில் நல்லாட்சியை அமைக்கும்; அதற்குத் துணையாக நான் எப்போதும் உங்கள் பக்கத்தில் இருப்பேன்" என்று கே.டி.ராஜேந்திர பாலாஜி பேசினார்.